جانے والے کو کہاں روک سکا ہے کوئی

تم چلے ہو تو کوئی روکنے والا بھی نہیں

کسے کہیں کہ رفاقت کا داغ ہے دل پر

بچھڑنے والا تو کھل کر کبھی ملا ہی نہ تھا

ہم کو پہچان کہ اے بزم چمن زار وجود

ہم نہ ہوتے تو تجھے کس نے سنوارا ہوتا

ہمارے ہاتھ فقط ریت کے صدف آئے

کہ ساحلوں پہ ستارہ کوئی رہا ہی نہ تھا

ذرا سی بات پہ کیا کیا فسانہ سازی ہے

میں خود بھی چاہتا کب تھا کہ داستاں نہ بنے

رگ ہر ساز یہ کہتی ہے کہ اے نغمہ طراز

مجھ کو اک سلطنت صوت و صدا چاہیے تھی

جسے درپیش جدائی ہو اسے کیا معلوم

کون سی بات کو کس طرح بیاں ہونا ہے

اڑا ہے رفتہ رفتہ رنگ تصویر محبت کا

ہوئی ہے رسم الفت بے وقار آہستہ آہستہ

دیوار خستگی ہوں مجھے ہاتھ مت لگا

میں گر پڑوں گا دیکھ مجھے آسرا نہ دے

خفا نہ ہو کہ ترا حسن ہی کچھ ایسا تھا

میں تجھ سے پیار نہ کرتا تو اور کیا کرتا

ہم نے ہر خواب کو تعبیر عطا کی اسلمؔ

ورنہ ممکن تھا کہ ہر نقش ادھورا ہوتا

جوئے نغمات پہ تصویر سی لرزاں دیکھی

لب تصویر پہ ٹھہرا ہوا نغمہ دیکھا