ham ki māyūs nahīñ haiñ unheñ pā hī leñge

log kahte haiñ ki DhūñDe se ḳhudā miltā hai

hum ki mayus nahin hain unhen pa hi lenge

log kahte hain ki DhunDe se KHuda milta hai

maiñ pairvi-e-ahl-e-siyāsat nahīñ kartā

ik rāsta in sab se judā chāhiye mujh ko

main pairwi-e-ahl-e-siyasat nahin karta

ek rasta in sab se juda chahiye mujh ko

uThtī to hai sau baar pe mujh tak nahīñ aatī

is shahr meñ chaltī hai havā sahmī huī sī

uThti to hai sau bar pe mujh tak nahin aati

is shahr mein chalti hai hawa sahmi hui si

vo ayādat ko to aayā thā magar jaate hue

apnī tasvīreñ bhī kamre se uThā kar le gayā

wo ayaadat ko to aaya tha magar jate hue

apni taswiren bhi kamre se uTha kar le gaya

zamāne bhar ne kahā 'arsh' jo, ḳhushī se sahā

par ek lafz jo us ne kahā sahā na gayā

zamane bhar ne kaha 'arsh' jo, KHushi se saha

par ek lafz jo us ne kaha saha na gaya