sang-e-dar us ka har ek dar pe laga milta hai

sañg-e-dar us kā har ik dar pe lagā miltā hai

dil ko āvāra-mizājī kā mazā miltā hai

jo bhī gul hai vo kisī pairhan-e-gul par hai

jo bhī kāñTā hai kisī dil meñ chubhā miltā hai

shauq vo daam ki jo ruḳhsat-e-parvāz na de

dil vo taa.ir ki use yuuñ bhī mazā miltā hai

vo jo baiThe haiñ bane nāseh-e-mushfiq sar par

koī pūchhe to bhalā aap ko kyā miltā hai

ham ki māyūs nahīñ haiñ unheñ pā hī leñge

log kahte haiñ ki DhūñDe se ḳhudā miltā hai

dām-e-tazvīr na ho shauq gulū-gīr na ho

mai-kada 'arsh' hameñ aaj khulā miltā hai

sang-e-dar us ka har ek dar pe laga milta hai

dil ko aawara-mizaji ka maza milta hai

jo bhi gul hai wo kisi pairhan-e-gul par hai

jo bhi kanTa hai kisi dil mein chubha milta hai

shauq wo dam ki jo ruKHsat-e-parwaz na de

dil wo tair ki use yun bhi maza milta hai

wo jo baiThe hain bane naseh-e-mushfiq sar par

koi puchhe to bhala aap ko kya milta hai

hum ki mayus nahin hain unhen pa hi lenge

log kahte hain ki DhunDe se KHuda milta hai

dam-e-tazwir na ho shauq gulu-gir na ho

mai-kada 'arsh' hamein aaj khula milta hai