duniyā to ham se haath milāne ko aa.ī thī

ham ne hī e.atibār dobāra nahīñ kiyā

duniya to hum se hath milane ko aai thi

hum ne hi eatibar dobara nahin kiya

faisla bichhaḌne kā kar liyā hai jab tum ne

phir mirī tamannā kyā phir mirī ijāzat kyuuñ

faisla bichhaDne ka kar liya hai jab tum ne

phir meri tamanna kya phir meri ijazat kyun

ta.alluq jo bhī rakkho soch lenā

ki ham rishta nibhānā jānte haiñ

talluq jo bhi rakkho soch lena

ki hum rishta nibhana jaante hain

mujh meñ ab maiñ nahīñ rahī baaqī

maiñ ne chāhā hai is qadar tum ko

mujh mein ab main nahin rahi baqi

main ne chaha hai is qadar tum ko

ab ke ham ne bhī diyā tark-e-ta.alluq kā javāb

hoñT ḳhāmosh rahe aañkh ne bārish nahīñ kī

ab ke hum ne bhi diya tark-e-talluq ka jawab

honT KHamosh rahe aankh ne barish nahin ki