mujh se bigaḌ ga.e to raqīboñ kī ban ga.ī

ġhairoñ meñ baT rahā hai mirā e'tibār aaj

mujh se bigaD gae to raqibon ki ban gai

ghairon mein baT raha hai mera e'tibar aaj

duur se yuuñ diyā mujhe bosa

hoñT kī hoñT ko ḳhabar na huī

dur se yun diya mujhe bosa

honT ki honT ko KHabar na hui

pyaar apne pe jo aatā hai to kyā karte haiñ

ā.īna dekh ke muñh chuum liyā karte haiñ

pyar apne pe jo aata hai to kya karte hain

aaina dekh ke munh chum liya karte hain

agarche vo be-parda aa.e hue haiñ

chhupāne kī chīzeñ chhupā.e hue haiñ

agarche wo be-parda aae hue hain

chhupane ki chizen chhupae hue hain

jitne achchhe haiñ maiñ huuñ un meñ burā

haiñ bure jitne un meñ achchhā huuñ

jitne achchhe hain main hun un mein bura

hain bure jitne un mein achchha hun

niiñd se uTh kar vo kahnā yaad hai

tum ko kyā sūjhī ye aadhī raat ko

nind se uTh kar wo kahna yaad hai

tum ko kya sujhi ye aadhi raat ko

jo un ko lipTā ke gaal chūmā hayā se aane lagā pasīna

huī hai bosoñ kī garm bhaTTī khiñche na kyūñkar sharāb-e-āriz

jo un ko lipTa ke gal chuma haya se aane laga pasina

hui hai boson ki garm bhaTTi khinche na kyunkar sharab-e-ariz

mohabbat ne 'mā.il' kiyā har kisī ko

kisī par kisī ko kisī par kisī ko

mohabbat ne 'mail' kiya har kisi ko

kisi par kisi ko kisi par kisi ko

ramazāñ meñ tū na jā rū-ba-rū un ke 'mā.il'

qabl-e-iftār badal jā.egī niyyat terī

ramazan mein tu na ja ru-ba-ru un ke 'mail'

qabl-e-iftar badal jaegi niyyat teri

tauba khaḌī hai dar pe jo fariyād ke liye

ye mai-kada bhī kyā kisī qaazī kā ghar huā

tauba khaDi hai dar pe jo fariyaad ke liye

ye mai-kada bhi kya kisi qazi ka ghar hua

tum ko ma.alūm javānī kā mazā hai ki nahīñ

ḳhvāb hī meñ kabhī kuchh kaam huā hai ki nahīñ

tum ko malum jawani ka maza hai ki nahin

KHwab hi mein kabhi kuchh kaam hua hai ki nahin

khol kar zulf-e-musalsal ko paḌhī us ne namāz

ghar meñ allāh ke bhī jaal bichhā kar aayā

khol kar zulf-e-musalsal ko paDhi us ne namaz

ghar mein allah ke bhi jal bichha kar aaya

ġhair kā haal to kahtā huuñ nujūmī ban kar

āp-bītī nahīñ ma.alūm vo nādān huuñ maiñ

ghair ka haal to kahta hun nujumi ban kar

aap-biti nahin malum wo nadan hun main

maiñ hī momin maiñ hī kāfir maiñ hī ka.aba maiñ hī dair

ḳhud ko maiñ sajde karūñgā dil meñ tum ho dil meñ tum

main hi momin main hi kafir main hi kaba main hi dair

KHud ko main sajde karunga dil mein tum ho dil mein tum

vo raat aa.e ki sar terā le ke baazū par

tujhe sulā.ūñ bayāñ kar ke maiñ fasāna-e-ishq

wo raat aae ki sar tera le ke bazu par

tujhe sulaun bayan kar ke main fasana-e-ishq

tum gale mil kar jo kahte ho ki ab had se na baḌh

haath to gardan meñ haiñ ham paañv phailā.eñge kyā

tum gale mil kar jo kahte ho ki ab had se na baDh

hath to gardan mein hain hum panw phailaenge kya

va.ada kiyā hai ġhair se aur vo bhī vasl kā

kullī karo huzūr huā hai dahan ḳharāb

wada kiya hai ghair se aur wo bhi wasl ka

kulli karo huzur hua hai dahan KHarab

vaa.iz kā e'tirāz ye but haiñ ḳhudā nahīñ

merā ye e'tiqād ki jalve ḳhudā ke haiñ

waiz ka e'tiraaz ye but hain KHuda nahin

mera ye e'tiqad ki jalwe KHuda ke hain

musalmāñ kāfiroñ meñ huuñ musalmānoñ meñ kāfir huuñ

ki qur.āñ sar pe but āñkhoñ meñ hai zunnār pahlū meñ

musalman kafiron mein hun musalmanon mein kafir hun

ki quran sar pe but aankhon mein hai zunnar pahlu mein

jo aa.e hashr meñ vo sab ko mārte aa.e

jidhar nigāh phirī choT par lagā.ī choT

jo aae hashr mein wo sab ko marte aae

jidhar nigah phiri choT par lagai choT

saarī ḳhilqat raah meñ hai aur ho manzil meñ tum

donoñ aalam dil se bāhar haiñ faqat ho dil meñ tum

sari KHilqat rah mein hai aur ho manzil mein tum

donon aalam dil se bahar hain faqat ho dil mein tum

na.ī sadā ho na.e hoñT hoñ nayā lahja

na.ī zabāñ se kaho gar kahūñ fasāna-e-ishq

nai sada ho nae honT hon naya lahja

nai zaban se kaho gar kahun fasana-e-ishq

naaz kar naaz tire naaz pe hai naaz mujhe

merī tanhā.ī hai partav tirī yaktā.ī kā

naz kar naz tere naz pe hai naz mujhe

meri tanhai hai partaw teri yaktai ka

miTī kuchh banī kuchh vo thī kuchh huī kuchh

zabāñ tak mirī dāstāñ aate aate

miTi kuchh bani kuchh wo thi kuchh hui kuchh

zaban tak meri dastan aate aate

kyā aa.ī thiiñ hūreñ tire ghar raat ko mehmāñ

kal ḳhvāb meñ ujḌā huā firdaus-e-barīñ thā

kya aai thin huren tere ghar raat ko mehman

kal KHwab mein ujDa hua firdaus-e-barin tha

band-e-qabā meñ bāñdh liyā le ke dil mirā

siine pe us ke phuul khilā hai gulāb kā

band-e-qaba mein bandh liya le ke dil mera

sine pe us ke phul khila hai gulab ka

hai hukm-e-ām ishq alaihis-salām kā

puujo butoñ ko bhed kuchh in meñ ḳhudā ke haiñ

hai hukm-e-am ishq alaihis-salam ka

pujo buton ko bhed kuchh in mein KHuda ke hain

merā salām ishq alaihis-salām ko

ḳhusrav udhar ḳharāb idhar kohkan ḳharāb

mera salam ishq alaihis-salam ko

KHusraw udhar KHarab idhar kohkan KHarab

gar bas chale to aap phirūñ apne gard maiñ

ka.abe ko jā ke kaun ho ai jān-e-man ḳharāb

gar bas chale to aap phirun apne gard main

kabe ko ja ke kaun ho ai jaan-e-man KHarab

jalsoñ meñ ḳhalvatoñ meñ ḳhayāloñ meñ ḳhvāb meñ

pahuñchī kahāñ kahāñ nigah-e-intizār aaj

jalson mein KHalwaton mein KHayalon mein KHwab mein

pahunchi kahan kahan nigah-e-intizar aaj

jā ke maiñ kū-e-butāñ meñ ye sadā detā huuñ

dil o diiñ bechne aayā hai musalmāñ koī

ja ke main ku-e-butan mein ye sada deta hun

dil o din bechne aaya hai musalman koi

kuchh na pūchho zāhidoñ ke bātin o zāhir kā haal

hai añdherā ghar meñ aur bāhar dhuāñ battī charāġh

kuchh na puchho zahidon ke baatin o zahir ka haal

hai andhera ghar mein aur bahar dhuan batti charagh

duniyā ne muñh pe Daalā hai parda sarāb kā

hote haiñ dauḌ dauḌ ke tishna-dahan ḳharāb

duniya ne munh pe Dala hai parda sarab ka

hote hain dauD dauD ke tishna-dahan KHarab

āsmāñ khaa.e to zamīn dekhe

dahan-e-gor kā nivālā huuñ

aasman khae to zamin dekhe

dahan-e-gor ka niwala hun

vo bazm meñ haiñ rote haiñ ushshāq chau taraf

paanī hai gird-e-anjuman aur anjuman meñ aag

wo bazm mein hain rote hain ushshaq chau taraf

pani hai gird-e-anjuman aur anjuman mein aag

chāk-e-dil se jhāñkiye duniyā idhar se diin udhar

dekhiye sab kā tamāshā is shigāf-e-dar se aap

chaak-e-dil se jhankiye duniya idhar se din udhar

dekhiye sab ka tamasha is shigaf-e-dar se aap

hañgām-e-qanā.at dil-e-murda huā zinda

mazmūn-e-qum e.ajāz-e-lab-e-nān-e-javīñ thā

hangam-e-qanaat dil-e-murda hua zinda

mazmun-e-qum eajaz-e-lab-e-nan-e-jawin tha