nikli jo ruh ho gae ajza-e-tan KHarab

niklī jo ruuh ho ga.e ajzā-e-tan ḳharāb

ik sham' bujh ga.ī to huī anjuman ḳharāb

kyuuñ Dāltā hai ḳhaak ki hogā kafan ḳharāb

maiñ huuñ safed-posh na kar pairahan ḳharāb

jī meñ ye hai ki dil hī ko sajde kyā karūñ

dair-o-haram meñ log haiñ ai jān-e-man ḳharāb

nāzuk diloñ kā husn hai rañg-e-shikastagī

phaTne se kab guloñ kā huā pairahan ḳharāb

duniyā ne muñh pe Daalā hai parda sarāb kā

hote haiñ dauḌ dauḌ ke tishna-dahan ḳharāb

iblīs se ye kahtā hai lā'nat kā tauq roz

aadam ḳharāb yā sifat mā-o-man ḳharāb

kyā ḳhushnumā ho ḳhizr baḌhe gar libās-e-umr

qad se jo ho darāz to ho pairahan ḳharāb

merā salām-e-ishq alaihis-salām ko

ḳhusrav idhar ḳharāb udhar kohkan ḳharāb

yūsuf ke husn ne ye zuleḳhā ko dī sadā

lo uñgliyāñ kaTīñ vo hue ta.ana-zan ḳharāb

gar bas chale to aap phirūñ apne gird meñ

kā'be ko jā ke kaun ho ai jān-e-man ḳharāb

zaḳhmī huā hai naam ko dar-parda husn bhī

yūsuf kā ḳhūn-e-gurg se hai pairahan ḳharāb

va.ada kiyā hai ġhair se aur vo bhī vasl kā

kullī karo huzūr huā hai dahan ḳharāb

ai ḳhāk-e-gor dekh na dhabbā lage kahīñ

rakh duuñ abhī utaar ke gar ho kafan ḳharāb

kaisī bhī ho zamīn 'ajab hal hai tab-e-tez

'mā.il' jo bo.eñ ham na ho tuḳhm-e-suḳhan ḳharāb

nikli jo ruh ho gae ajza-e-tan KHarab

ek sham' bujh gai to hui anjuman KHarab

kyun Dalta hai KHak ki hoga kafan KHarab

main hun safed-posh na kar pairahan KHarab

ji mein ye hai ki dil hi ko sajde kya karun

dair-o-haram mein log hain ai jaan-e-man KHarab

nazuk dilon ka husn hai rang-e-shikastagi

phaTne se kab gulon ka hua pairahan KHarab

duniya ne munh pe Dala hai parda sarab ka

hote hain dauD dauD ke tishna-dahan KHarab

iblis se ye kahta hai la'nat ka tauq roz

aadam KHarab ya sifat ma-o-man KHarab

kya KHushnuma ho KHizr baDhe gar libas-e-umr

qad se jo ho daraaz to ho pairahan KHarab

mera salam-e-ishq alaihis-salam ko

KHusraw idhar KHarab udhar kohkan KHarab

yusuf ke husn ne ye zuleKHa ko di sada

lo ungliyan kaTin wo hue tana-zan KHarab

gar bas chale to aap phirun apne gird mein

ka'be ko ja ke kaun ho ai jaan-e-man KHarab

zaKHmi hua hai nam ko dar-parda husn bhi

yusuf ka KHun-e-gurg se hai pairahan KHarab

wada kiya hai ghair se aur wo bhi wasl ka

kulli karo huzur hua hai dahan KHarab

ai KHak-e-gor dekh na dhabba lage kahin

rakh dun abhi utar ke gar ho kafan KHarab

kaisi bhi ho zamin 'ajab hal hai tab-e-tez

'mail' jo boen hum na ho tuKHm-e-suKHan KHarab