gumbad ki aawaz

vaqt kī mehrāb se lipTī huī

māvarā kī bel ko paanī na do

ye harī kab thī jo ab hogī harī

haiñ azal se ḳhushk is ke shāḳh-sār

phailte rahte haiñ sub.h-o-shām jin ke tār-o-pūd

misl-e-tār-e-jabr-e-nā-paidā-kinār!

nuqta-dar-nuqta hai is kā markaz-e-lā-muntahī

dā.era-dar-dā.era mehrāb-dar-mehrāb hai is kā savād

jis ke lā-mahdūd-o-nā-mā'lūm kī taḳhlīq haiñ

vasvase hairāniyāñ dahshat-gah-e-ādam-nazhād

jis kī ik ik shāḳh ik ik barg ke ḳhāshāk par

jam rahā hai jaane vaalī aane vaalī an-ginat sadiyoñ kā daur

jis ke pech-o-ḳham meñ pech-o-tāb khāte haiñ mazāfāt-e-'adam

jis ke uljhāo meñ uljhe haiñ maqāmāt-e-vujūd

sab dhuāñ hai

sarhad-e-imkāñ se le kar lā-makāñ tak sab dhuāñ

sirf ye lamha ki jo maujūd hai

aur is lamhe kī zindānī ġham-e-jāñ kī haqīqat ke sivā

koī shai is dahr kī daa.em nahīñ

rāstoñ kī zad pe haiñ sab rāste

be-amāñ gardish meñ hai getī kā chaak

har jihat har rāh-e-hast-o-būd meñ

uḌ rahī hai vaqt ke qadmoñ kī ḳhaak

jaane vaalī sā'ateñ kab ā.eñgī

aane vaalī sā'ateñ kyā lā.eñgī

bhuul jaao bhuul jaao bhuul jaao

aur ye lamha ki jo maujūd hai

hai yahī sab kuchh isī ke naaz uThāo

hai yahī sab kuchh isī par jaañ gañvāo

jaañ gañvāo jaañ gañvāo jaañ gañvāo

waqt ki mehrab se lipTi hui

mawara ki bel ko pani na do

ye hari kab thi jo ab hogi hari

hain azal se KHushk is ke shaKH-sar

phailte rahte hain subh-o-sham jin ke tar-o-pud

misl-e-tar-e-jabr-e-na-paida-kinar!

nuqta-dar-nuqta hai is ka markaz-e-la-muntahi

daera-dar-daera mehrab-dar-mehrab hai is ka sawad

jis ke la-mahdud-o-na-ma'lum ki taKHliq hain

waswase hairaniyan dahshat-gah-e-adam-nazhad

jis ki ek ek shaKH ek ek barg ke KHashak par

jam raha hai jaane wali aane wali an-ginat sadiyon ka daur

jis ke pech-o-KHam mein pech-o-tab khate hain mazafat-e-'adam

jis ke uljhao mein uljhe hain maqamat-e-wujud

sab dhuan hai

sarhad-e-imkan se le kar la-makan tak sab dhuan

sirf ye lamha ki jo maujud hai

aur is lamhe ki zindani gham-e-jaan ki haqiqat ke siwa

koi shai is dahr ki daem nahin

raston ki zad pe hain sab raste

be-aman gardish mein hai geti ka chaak

har jihat har rah-e-hast-o-bud mein

uD rahi hai waqt ke qadmon ki KHak

jaane wali sa'aten kab aaengi

aane wali sa'aten kya laengi

bhul jao bhul jao bhul jao

aur ye lamha ki jo maujud hai

hai yahi sab kuchh isi ke naz uThao

hai yahi sab kuchh isi par jaan ganwao

jaan ganwao jaan ganwao jaan ganwao