chamakta lamha

tū lamhe kī zad se kahāñ bach sakegā

ye chamkīlā lamha ki tere 'aqab meñ azal se ravāñ hai

tujhe rauñd kar yuuñ baḌhegā ki jaise

par-e-kāh se muḳhtalif tū nahīñ hai

lachakte hue sard ziine pe paaoñ rakhe

tū kisī aisī manzil kī dhun meñ ravāñ hai

jahāñ is lapakte hue tund lamhe kī zad se amaañ hai

magar aisī manzil kahāñ hai

ye lamha ki ḳhud an-ginat sā'atoñ se murattab huā hai

ye lamha ki sūrat badal kar shab-o-roz meñ Dhal gayā hai

shab-o-roz ik dūsre ke ta'āqub meñ baḌhte

mah-o-sāl kī ek lambī sī maalā bane haiñ

vo maalā tirī narm gardan meñ ik tauq sā ban ke ab jhūltī hai

ye lamha ye sīmābī chamkīlā mankā

lapak kar tirī lambī maalā ke halqe meñ aatā hai jis dam

to maalā kā baḌhtā huā bojh gardan ko terī

zamīñ-bos hone pe majbūr kartā hai aur tū

baḌī bebasī se

ta'āqub meñ aatī huī maut ko dekhtā hai

lachaktā huā sard ziina ma'an boltā hai

tirā haat lakḌī kī bāhoñ se yak-dam phisal kar

tire laḌkhaḌāte hue jism ko toltā hai

magar kaun jaane tujhe kyā huā hai

tū ik bhīgī gaThḌī banā sard ziine ke qadmoñ meñ dam toḌtā hai

lapaktā huā tund lamha tujhe rauñd kar aise baḌhtā hai jaise

par-e-kāh se muḳhtalif tū nahīñ hai

tu lamhe ki zad se kahan bach sakega

ye chamkila lamha ki tere 'aqab mein azal se rawan hai

tujhe raund kar yun baDhega ki jaise

par-e-kah se muKHtalif tu nahin hai

lachakte hue sard zine pe paon rakhe

tu kisi aisi manzil ki dhun mein rawan hai

jahan is lapakte hue tund lamhe ki zad se aman hai

magar aisi manzil kahan hai

ye lamha ki KHud an-ginat sa'aton se murattab hua hai

ye lamha ki surat badal kar shab-o-roz mein Dhal gaya hai

shab-o-roz ek dusre ke ta'aqub mein baDhte

mah-o-sal ki ek lambi si mala bane hain

wo mala teri narm gardan mein ek tauq sa ban ke ab jhulti hai

ye lamha ye simabi chamkila manka

lapak kar teri lambi mala ke halqe mein aata hai jis dam

to mala ka baDhta hua bojh gardan ko teri

zamin-bos hone pe majbur karta hai aur tu

baDi bebasi se

ta'aqub mein aati hui maut ko dekhta hai

lachakta hua sard zina ma'an bolta hai

tera hat lakDi ki bahon se yak-dam phisal kar

tere laDkhaDate hue jism ko tolta hai

magar kaun jaane tujhe kya hua hai

tu ek bhigi gaThDi bana sard zine ke qadmon mein dam toDta hai

lapakta hua tund lamha tujhe raund kar aise baDhta hai jaise

par-e-kah se muKHtalif tu nahin hai