lauh-e-daira

maiñ dā.ere par paḌā huā apne ḳhuuñ ke dhabboñ ko chāTtā huuñ

ki mere hone kā saarā ilzām mere sar hai

laboñ kī dahlīz par mirī ruuh kab se fariyād kar rahī hai

maiñ apne siine meñ jal rahā huuñ maiñ apnī āñkhoñ meñ bujh rahā huuñ

ye shāh-rāhoñ kā hādsa hai magar kisī ko ḳhabar nahīñ hai

mujhe bachā lo mujhe bachā lo

hujūm-e-ādam javāb de kyā ye koī sahrā hai shahr kī rahguzar nahīñ hai

maiñ phir na ā.ūñgā merī āvāz phir na aa.egī

merā isbāt phir na Takrā.egā tumhārī batālatoñ se

magar mirā baal baal maqrūz hai mire jabr-e-āgahī kā

maiñ apnī āvāz kā badan huuñ

jo chup hai us kī zabān us ke dahan meñ saḌ jā.egī

maiñ bolūñgā aur mirā bolnā hī merā ziyāñ bhī Thahregā

mere siine meñ jo ḳharāsheñ sulag rahī haiñ

vo āḳhir-e-kār merī lauh-e-mazār kā hāshiya baneñgī

javāb kī bastiyoñ ke darvāze band haiñ aur mirā galā ḳhushk ho chukā hai

tamām insān apnī parchhā.iyoñ ko oḌhe hue haiñ aur shaam bah rahī hai

dhund ne chauk ke baḌe burj kā musallas nigal liyā hai

sukūt kā zamharīr samtoñ meñ ghul chukā hai

maiñ ek sangīn mujassama huuñ jise banā kar jise ḳhayābāñ meñ nasb kar ke

mujassama-sāz aur me'mār apnā rozīna pā chuke haiñ

maiñ ek sangīñ mujassama huuñ

jo dhund kī tailisān oḌhe hue hayūloñ ko tak rahā hai

magar samā'at kā jaal ab jald bun liyā jaa.e

sun liyā jaa.e

mere atrāf ek tūfān uThne vaalā hai

jo zamīnoñ ko yuuñ nigal legā jaise ye log apne logoñ kā ḳhūn-e-basta nigal rahe haiñ

maiñ apne siine meñ jal rahā huuñ apnī āñkhoñ meñ bujh rahā huuñ

main daere par paDa hua apne KHun ke dhabbon ko chaTta hun

ki mere hone ka sara ilzam mere sar hai

labon ki dahliz par meri ruh kab se fariyaad kar rahi hai

main apne sine mein jal raha hun main apni aankhon mein bujh raha hun

ye shah-rahon ka hadsa hai magar kisi ko KHabar nahin hai

mujhe bacha lo mujhe bacha lo

hujum-e-adam jawab de kya ye koi sahra hai shahr ki rahguzar nahin hai

main phir na aaunga meri aawaz phir na aaegi

mera isbaat phir na Takraega tumhaari batalaton se

magar mera baal baal maqruz hai mere jabr-e-agahi ka

main apni aawaz ka badan hun

jo chup hai us ki zaban us ke dahan mein saD jaegi

main bolunga aur mera bolna hi mera ziyan bhi Thahrega

mere sine mein jo KHarashen sulag rahi hain

wo aaKHir-e-kar meri lauh-e-mazar ka hashiya banengi

jawab ki bastiyon ke darwaze band hain aur mera gala KHushk ho chuka hai

tamam insan apni parchhaiyon ko oDhe hue hain aur sham bah rahi hai

dhund ne chauk ke baDe burj ka musallas nigal liya hai

sukut ka zamharir samton mein ghul chuka hai

main ek sangin mujassama hun jise bana kar jise KHayaban mein nasb kar ke

mujassama-saz aur me'mar apna rozina pa chuke hain

main ek sangin mujassama hun

jo dhund ki tailisan oDhe hue hayulon ko tak raha hai

magar sama'at ka jal ab jald bun liya jae

sun liya jae

mere atraf ek tufan uThne wala hai

jo zaminon ko yun nigal lega jaise ye log apne logon ka KHun-e-basta nigal rahe hain

main apne sine mein jal raha hun apni aankhon mein bujh raha hun