guftugu jo hoti hai sal-e-nau se ambar ki

guftugū jo hotī hai sāl-e-nau se ambar kī

garm hone lagtī haiñ sardiyāñ december kī

jaane vaale lamhe to lauT kar nahīñ aate

kārobār-e-duniyā ke par ye ruk nahīñ paate

kyoñ na mas.ale saare is tarah se hal kar leñ

sāl-e-nau ke har pal ko pyaar kī ġhazal kar leñ

sajda-e-mohabbat se aao mo'atabar kar deñ

sāl-e-nau ke āñgan ko ḳhushbuoñ kā ghar kar deñ

tan-badan ummīdoñ ke phir se mahke mahke haiñ

ruḳh na.ī tamāzat se ḳhvāhishoñ ke dahke haiñ

ik nayā varaq kholeñ ham kitāb-e-hastī kā

dil sabaq paḌheñ phir se zindagī kī mastī kā

dil se dil ke milne kī nuqra.ī sadā.eñ hoñ

rañg-e-ishq-o-ulfat kī reshmī havā.eñ hoñ

dil ke saaz se phūTeñ yuuñ mohabbatoñ ke sur

hoñ ḳhushī ke ḳhvāboñ ke sur haqīqatoñ ke sur

amn aur tahaffuz se shaad phir raheñ ham sab

nafrateñ na bāñTeñ ab mulk qaum aur maz.hab

dahshatoñ kī lāshoñ par amn kī ridā Dāleñ

aur ḳhizāñ ke mausam ko fasl-e-gul banā Dāleñ

sāl-e-nau kī aamad par mushkileñ sabhī hāreñ

itnī hoñ añdheroñ par raushnī kī yalġhāreñ

mandir-o-masājid sab amn ke hoñ gahvāre

ḳhvāb 'alīnā' insāñ ke hoñ kabhī na banjāre

guftugu jo hoti hai sal-e-nau se ambar ki

garm hone lagti hain sardiyan december ki

jaane wale lamhe to lauT kar nahin aate

karobar-e-duniya ke par ye ruk nahin pate

kyon na masale sare is tarah se hal kar len

sal-e-nau ke har pal ko pyar ki ghazal kar len

sajda-e-mohabbat se aao mo'atabar kar den

sal-e-nau ke aangan ko KHushbuon ka ghar kar den

tan-badan ummidon ke phir se mahke mahke hain

ruKH nai tamazat se KHwahishon ke dahke hain

ek naya waraq kholen hum kitab-e-hasti ka

dil sabaq paDhen phir se zindagi ki masti ka

dil se dil ke milne ki nuqrai sadaen hon

rang-e-ishq-o-ulfat ki reshmi hawaen hon

dil ke saz se phuTen yun mohabbaton ke sur

hon KHushi ke KHwabon ke sur haqiqaton ke sur

amn aur tahaffuz se shad phir rahen hum sab

nafraten na banTen ab mulk qaum aur mazhab

dahshaton ki lashon par amn ki rida Dalen

aur KHizan ke mausam ko fasl-e-gul bana Dalen

sal-e-nau ki aamad par mushkilen sabhi haaren

itni hon andheron par raushni ki yalghaaren

mandir-o-masajid sab amn ke hon gahware

KHwab 'alina' insan ke hon kabhi na banjare