sard mulaqat

is baar jab tum aao

to is ThiThurtī raat meñ

apne jūtoñ ke tasme Dhīle mat karnā

kamre kī añgīThī ab sard ho chukī hai

aur hameñ bas itnī hī der ruknā hai

jitnī der meñ

alaav ke kināre paḌī koī āḳhrī chingārī

apnī hī raakh ke bojh se kaalī paḌ jaa.e

hamāre darmiyān ab

koī aisī udhḌī huī sīvan nahīñ bachī

jise be-kār bātoñ ke dhāge se siyā jaa.e

ham donoñ ne apne hisse ke saare gile saarī shikāyateñ

pichhle saal kī sīlan-zada dīvāroñ meñ chunvā dī haiñ

ab to bas

ek rasm hai

jaise mayyat ko dafnāne ke baa'd log

qabristān meñ lage nal ke barfāb paanī se

ḳhāmoshī se haath dhote haiñ

ye mulāqāt

kisī purānī ḳhasta-hāl koTharī kā vo āḳhrī chakkar hai

jahāñ se saarā sāmān uThāyā jā chukā ho

aur bas ye dekhne ke liye muḌnā ho

ki koī zarūrī chiiz pīchhe to nahīñ rah ga.ī

aur ham donoñ jānte haiñ

vahāñ kuchh nahīñ bachā

na merī uñgliyoñ ke poroñ meñ

tumhāre bāloñ kī koī uljhan baaqī hai

na tumhāre māthe par

mere kisī purāne intizār kī koī shikan

ye alvidā'

kisī bus-stand kī jazbātī bhiiḌ nahīñ

ye to us purānī rasīd kī tarah hai

jis kā rang garm lambe bhārī-bharkam

coat kī andarūnī jeb meñ rakkhe rakkhe

bilkul safed ho chukā ho

us par likhā kyā thā

ab koī nahīñ jāntā

jab tum uTho

to dhuñdle shīshoñ se bāhar dekhte hue

palaT kar dekhne kī rivāyatī zahmat na karnā

kyūñki maiñ bhī tumheñ jaate hue nahīñ dekhūñgā

merī nazreñ to shāyad

us vaqt

almārī ke us ḳhālī ḳhāne par jamī hoñgī

jahāñ kabhī tumhārī yādeñ ḳhat

tohfe rakkhe rahte the

tumhāre qadmoñ kī chaap

bāhar galī kī gahrī dhund aur sannāTe meñ ghul jā.egī

aur maiñ

bas khiḌkī kā vo paT band kar dūñgā

jo jamā dene vaalī sard havā ke zor se

aksar rātoñ ko

bilā-vaj.h khul jaayā kartā thā

is bar jab tum aao

to is ThiThurti raat mein

apne juton ke tasme Dhile mat karna

kamre ki angiThi ab sard ho chuki hai

aur hamein bas itni hi der rukna hai

jitni der mein

alaw ke kinare paDi koi aaKHri chingari

apni hi rakh ke bojh se kali paD jae

hamare darmiyan ab

koi aisi udhDi hui siwan nahin bachi

jise be-kar baaton ke dhage se siya jae

hum donon ne apne hisse ke sare gile sari shikayaten

pichhle sal ki silan-zada diwaron mein chunwa di hain

ab to bas

ek rasm hai

jaise mayyat ko dafnane ke ba'd log

qabristan mein lage nal ke barfab pani se

KHamoshi se hath dhote hain

ye mulaqat

kisi purani KHasta-haal koThari ka wo aaKHri chakkar hai

jahan se sara saman uThaya ja chuka ho

aur bas ye dekhne ke liye muDna ho

ki koi zaruri chiz pichhe to nahin rah gai

aur hum donon jaante hain

wahan kuchh nahin bacha

na meri ungliyon ke poron mein

tumhaare baalon ki koi uljhan baqi hai

na tumhaare mathe par

mere kisi purane intizar ki koi shikan

ye alwida'

kisi bus-stand ki jazbaati bhiD nahin

ye to us purani rasid ki tarah hai

jis ka rang garm lambe bhaari-bharkam

coat ki andaruni jeb mein rakkhe rakkhe

bilkul safed ho chuka ho

us par likha kya tha

ab koi nahin jaanta

jab tum uTho

to dhundle shishon se bahar dekhte hue

palaT kar dekhne ki riwayati zahmat na karna

kyunki main bhi tumhein jate hue nahin dekhunga

meri nazren to shayad

us waqt

almari ke us KHali KHane par jami hongi

jahan kabhi tumhaari yaaden KHat

tohfe rakkhe rahte the

tumhaare qadmon ki chap

bahar gali ki gahri dhund aur sannaTe mein ghul jaegi

aur main

bas khiDki ka wo paT band kar dunga

jo jama dene wali sard hawa ke zor se

aksar raaton ko

bila-wajh khul jaya karta tha