afsun-e-KHwab

uḌ rahī haiñ az-zamīñ tā-āsmāñ

dāman-e-lailā-e-shab kī dhajjiyāñ

vaqt ke māthe pe hai sadiyoñ kī dhuul

mal rahā hai chāñd chehre par bhabūl

bujh rahe haiñ najm-o-māh-o-kahkashāñ

ho chukā gul har charāġh-e-āsmāñ

ūñghte saa.e shajar so.e hue

qasr so.e bām-o-dar so.e hue

'arsh-o-farsh-o-bahr-o-bar haiñ mahv-e-ḳhvāb

maut hai 'umr-e-ravāñ ke ham-rikāb

jalva-gāhoñ meñ tarab ḳhānoñ meñ niiñd

mahfiloñ meñ niiñd aivānoñ meñ niiñd

kūcha-o-bāzār sākit ho ga.e

bahr ke siine meñ tūfāñ kho ga.e

dajla-e-tahzīb meñ tūfāñ nahīñ

'aql ke fitne balā-e-jāñ nahīñ

hosh ke dozaḳh kā laavā sard hai

matla’-e-fikr-o-nazar be-gard hai

kar ke pinhāñ āstīnoñ meñ sanam

so ga.e kitne yahūdān-e-haram

vo bhī zangī so rahe haiñ raat meñ

haiñ ḳhajil ā.īne jin ke haat meñ

rakh diyā hai aise bahroñ ne bhī saaz

jo bhare majmoñ meñ hoñ naġhma-tarāz

ho chuke vo kor bhī masrūf-e-ḳhvāb

jin kī nazroñ se haiñ larzāñ āftāb

ho ke tanqīdoñ ke chhajjoñ par savār

fikr ke baune nahīñ masrūf-e-kār

khā chuke haiñ raat ke tarkash kā tiir

shahr bhar ke ġhālib-o-hālī-o-mīr

said bhī haiñ daam meñ sayyād bhī

hazrat-e-fan-kār bhī naqqād bhī

kar ke puurā apnā apnā bevpār

so rahe haiñ fikr-o-fan ke sūd-ḳhvār

rakh ke sau nashtar rag-e-jāñ ke qarīb

jā chuke ghar qahva-ḳhānoñ ke adiib

bik chukī tanqīd kī jins-e-girāñ

band hai she'r-o-adab kī har dukāñ

ho chukā fikr-o-nazar kā mol-tol

chaḌh chukā sūraj pe tārīkī kā ḳhol

jahl ke nashtar na dānish kā gazand

so rahe haiñ kaise kaise halqa-band

vo bhī mahv-e-ḳhvāb haiñ 'ālī-maqām

jin kī peshānī pe likkhā hai ġhulām

bā-vujūd-e-mansab-o-tamkīn-o-jāh

jin kā qāmat naap letī hai nigāh

un kī gardan meñ bhī hai shab kī tanāb

ḳhūn-e-fann-o-fikr hai jin kī sharāb

chādareñ taane haiñ vo bhī sūd-ḳhvār

bandagī bhī jin kī hai yazdāñ-shikār

un ke mahloñ par bhī hai shab kī kamand

chal ke lāshoñ par jo hote haiñ buland

sub.h kī kirnoñ se bhar kar apnā jeb

le rahā hai dam añdhere kā fareb

bhuuk bhī ḳhvābīda hai iflās bhī

fikr bhī soī hai aur ehsās bhī

bis bharī koī hañsī hañstā nahīñ

aadmī ko aadmī Dastā nahīñ

ab kisī chehre pe 'ayyārī nahīñ

ab koī ā.īna zangārī nahīñ

yuuñ sukūt-e-shab meñ hotā hai gumāñ

jaise sākit ho ga.ī 'umr-e-ravāñ

ḳhvāb kā marham hai zaḳhm-e-zīst par

sī rahī hai raat har zaḳhm-e-jigar

raat kahtī hai mirā ik jaam pī

sī sake to zaḳhm-e-dil kā chaak sī

jāgte hī jāgte so jā.ūñ maiñ

ek shahr-e-ḳhvāb meñ kho jā.ūñ maiñ

mujh ko rah rah kar magar hotā hai ġham

kal ye fitne jaag uTheñge sub.h-dam

uD rahi hain az-zamin ta-asman

daman-e-laila-e-shab ki dhajjiyan

waqt ke mathe pe hai sadiyon ki dhul

mal raha hai chand chehre par bhabul

bujh rahe hain najm-o-mah-o-kahkashan

ho chuka gul har charagh-e-asman

unghte sae shajar soe hue

qasr soe baam-o-dar soe hue

'arsh-o-farsh-o-bahr-o-bar hain mahw-e-KHwab

maut hai 'umr-e-rawan ke ham-rikab

jalwa-gahon mein tarab KHanon mein nind

mahfilon mein nind aiwanon mein nind

kucha-o-bazar sakit ho gae

bahr ke sine mein tufan kho gae

dajla-e-tahzib mein tufan nahin

'aql ke fitne bala-e-jaan nahin

hosh ke dozaKH ka lawa sard hai

matla’-e-fikr-o-nazar be-gard hai

kar ke pinhan aastinon mein sanam

so gae kitne yahudan-e-haram

wo bhi zangi so rahe hain raat mein

hain KHajil aaine jin ke hat mein

rakh diya hai aise bahron ne bhi saz

jo bhare majmon mein hon naghma-taraaz

ho chuke wo kor bhi masruf-e-KHwab

jin ki nazron se hain larzan aaftab

ho ke tanqidon ke chhajjon par sawar

fikr ke baune nahin masruf-e-kar

kha chuke hain raat ke tarkash ka tir

shahr bhar ke ghaalib-o-haali-o-mir

said bhi hain dam mein sayyaad bhi

hazrat-e-fan-kar bhi naqqad bhi

kar ke pura apna apna bewpar

so rahe hain fikr-o-fan ke sud-KHwar

rakh ke sau nashtar rag-e-jaan ke qarib

ja chuke ghar qahwa-KHanon ke adib

bik chuki tanqid ki jins-e-giran

band hai she'r-o-adab ki har dukan

ho chuka fikr-o-nazar ka mol-tol

chaDh chuka suraj pe tariki ka KHol

jahl ke nashtar na danish ka gazand

so rahe hain kaise kaise halqa-band

wo bhi mahw-e-KHwab hain 'ali-maqam

jin ki peshani pe likkha hai ghulam

ba-wujud-e-mansab-o-tamkin-o-jah

jin ka qamat nap leti hai nigah

un ki gardan mein bhi hai shab ki tanab

KHun-e-fann-o-fikr hai jin ki sharab

chadaren tane hain wo bhi sud-KHwar

bandagi bhi jin ki hai yazdan-shikar

un ke mahlon par bhi hai shab ki kamand

chal ke lashon par jo hote hain buland

subh ki kirnon se bhar kar apna jeb

le raha hai dam andhere ka fareb

bhuk bhi KHwabida hai iflas bhi

fikr bhi soi hai aur ehsas bhi

bis bhari koi hansi hansta nahin

aadmi ko aadmi Dasta nahin

ab kisi chehre pe 'ayyari nahin

ab koi aaina zangari nahin

yun sukut-e-shab mein hota hai guman

jaise sakit ho gai 'umr-e-rawan

KHwab ka marham hai zaKHm-e-zist par

si rahi hai raat har zaKHm-e-jigar

raat kahti hai mera ek jam pi

si sake to zaKHm-e-dil ka chaak si

jagte hi jagte so jaun main

ek shahr-e-KHwab mein kho jaun main

mujh ko rah rah kar magar hota hai gham

kal ye fitne jag uThenge subh-dam