میں اپنے لیے ہوں

میں ہوں اور تحقیق میں ہوں

کہ میرے لیے سب سے کامل صداقت یہی ہے

مجھے کیا خبر ہے

کہ تم کون ہو

اور وہ کون ہے

کہ میں تو فقط خود کو محسوس کرتا ہوں

سنتا ہوں

اور دیکھتا ہوں

مری ساری اچھائیاں اور بدیاں بھی میری ہیں

میرے لیے ہیں

کہ میں نے جو آشوب جھیلے وہ میرے تھے

میرے لیے تھے

میں ان میں نہیں ہوں

جو ابلیس پر اپنے سارے گناہوں کا الزام دھرتے ہیں

اور خوبیوں کو کسی کا کرشمہ سمجھتے ہیں

اگر نیکیوں کے شرارے

بدی کے شگوفے

کہیں اور کھلتے ہیں

اور میرے اعمال ان کا فقط عکس ہی ہیں

تو میں کون ہوں

کس لیے ہوں

یہ سارے ہیولے مرے واسطے آج بے رنگ ہیں

رنگتیں اور خوشبو تو میرے تسلط میں ہیں

اور میں ایک خاکہ ہوں

جس میں مجھے آپ ہی رنگ بھرنے ہیں

خوشبو بسانی ہے

میں ہوں

میں اپنے لیے ہوں