main apne liye hun

maiñ huuñ aur tahqīq meñ huuñ

ki mere liye sab se kāmil sadāqat yahī hai

mujhe kyā ḳhabar hai

ki tum kaun ho

aur vo kaun hai

ki maiñ to faqat ḳhud ko mahsūs kartā huuñ

suntā huuñ

aur dekhtā huuñ

mirī saarī achhā.iyāñ aur badiyāñ bhī merī haiñ

mere liye haiñ

ki maiñ ne jo āshob jhele vo mere the

mere liye the

maiñ un meñ nahīñ huuñ

jo iblīs par apne saare gunāhoñ kā ilzām dharte haiñ

aur ḳhūbiyoñ ko kisī kā karishma samajhte haiñ

agar nekiyoñ ke sharāre

badī ke shagūfe

kahīñ aur khilte haiñ

aur mere ā'māl un kā faqat 'aks hī haiñ

to maiñ kaun huuñ

kis liye huuñ

ye saare hayūle mire vāste aaj be-rang haiñ

rangateñ aur ḳhushbū to mere tasallut meñ haiñ

aur maiñ ek ḳhāka huuñ

jis meñ mujhe aap hī rang bharne haiñ

ḳhushbū basānī hai

maiñ huuñ

maiñ apne liye huuñ

main hun aur tahqiq mein hun

ki mere liye sab se kaamil sadaqat yahi hai

mujhe kya KHabar hai

ki tum kaun ho

aur wo kaun hai

ki main to faqat KHud ko mahsus karta hun

sunta hun

aur dekhta hun

meri sari achhaiyan aur badiyan bhi meri hain

mere liye hain

ki main ne jo aashob jhele wo mere the

mere liye the

main un mein nahin hun

jo iblis par apne sare gunahon ka ilzam dharte hain

aur KHubiyon ko kisi ka karishma samajhte hain

agar nekiyon ke sharare

badi ke shagufe

kahin aur khilte hain

aur mere aa'mal un ka faqat 'aks hi hain

to main kaun hun

kis liye hun

ye sare hayule mere waste aaj be-rang hain

rangaten aur KHushbu to mere tasallut mein hain

aur main ek KHaka hun

jis mein mujhe aap hi rang bharne hain

KHushbu basani hai

main hun

main apne liye hun