ustad ka DanDa

chhīn le haath se ustād ke DañDā koī

badle DanDe ke khilā de hameñ anDā koī

anDā khāne se lahū jism meñ baḌh jaatā hai

chust hotā hai badan zehn nikhar jaatā hai

DañDā lekin hameñ kyā fā.eda pahuñchātā hai

jism ko detā hai dukh zehn ko uljhātā hai

chhīn le haath se ustād ke DañDā koī

badle DanDe ke khilā de hameñ anDā koī

kis qadar dete haiñ dukh ham ko ye haa.e DanDe

saarī duniyā se ḳhudā ab to miTā de DanDe

hai vo ustād burā jo ki jamā.e DanDe

hai vo shāgird bhī buddhū ki jo khaa.e DanDe

chhīn le haath se ustād ke DañDā koī

badle DanDe ke khilā de hameñ anDā koī

ab na schōl meñ DanDe kī ḳhudā.ī hogī

saare DanDoñ kī zamāne se safā.ī hogī

zor se DanDe ke hargiz na paḌhā.ī hogī

ab to schōl meñ anDoñ kī khilā.ī hogī

chhīn le haath se ustād ke DañDā koī

badle DanDe ke khilā de hameñ anDā koī

lad gayā ab to vo anDoñ kā zamāna sāhab

ho chukā ab to tarīqa ye purānā sāhab

jo mohabbat kā na gur aap ne jaanā sāhab

phir to dushvār huā paḌhnā paḌhānā sāhab

chhīn le haath se ustād ke DañDā koī

badle DanDe ke khilā de hameñ anDā koī

sar pe DanDe paḌeñ hargiz na ye uftād aa.e

tālib-e-ilm na kartā huā fariyād aa.e

kaash bhūlā huā shafqat kā sabaq yaad aa.e

baap ke ruup meñ schōl meñ ustād aa.e

chhīn le haath se ustād ke DañDā koī

badle DanDe ke khilā de hameñ anDā koī

chhin le hath se ustad ke DanDa koi

badle DanDe ke khila de hamein anDa koi

anDa khane se lahu jism mein baDh jata hai

chust hota hai badan zehn nikhar jata hai

DanDa lekin hamein kya faeda pahunchata hai

jism ko deta hai dukh zehn ko uljhata hai

chhin le hath se ustad ke DanDa koi

badle DanDe ke khila de hamein anDa koi

kis qadar dete hain dukh hum ko ye hae DanDe

sari duniya se KHuda ab to miTa de DanDe

hai wo ustad bura jo ki jamae DanDe

hai wo shagird bhi buddhu ki jo khae DanDe

chhin le hath se ustad ke DanDa koi

badle DanDe ke khila de hamein anDa koi

ab na school mein DanDe ki KHudai hogi

sare DanDon ki zamane se safai hogi

zor se DanDe ke hargiz na paDhai hogi

ab to school mein anDon ki khilai hogi

chhin le hath se ustad ke DanDa koi

badle DanDe ke khila de hamein anDa koi

lad gaya ab to wo anDon ka zamana sahab

ho chuka ab to tariqa ye purana sahab

jo mohabbat ka na gur aap ne jaana sahab

phir to dushwar hua paDhna paDhana sahab

chhin le hath se ustad ke DanDa koi

badle DanDe ke khila de hamein anDa koi

sar pe DanDe paDen hargiz na ye uftad aae

talib-e-ilm na karta hua fariyaad aae

kash bhula hua shafqat ka sabaq yaad aae

bap ke rup mein school mein ustad aae

chhin le hath se ustad ke DanDa koi

badle DanDe ke khila de hamein anDa koi