میرا قتل

میں آنسو ڈھونڈھتا ہوں اپنی آنکھوں میں

کہ ان آنکھوں کی ویرانی

مرے ماضی سے بھی انکار کرتی ہے

یہ اگلی ساعتوں کی نرم دستک ہے کہ میرا دل دھڑکتا ہے

یہ چہرے

جن سے میری بزم میں کل تک چراغاں تھا

انہیں پہچانتا ہوں میں

مگر کس سے کوئی پوچھے

وہ لمحہ کون سا تھا جس پہ میرے قتل کا الزام آتا ہے

بہت حیران ہو کر سوچتا ہوں میں

کہ اپنے قتل کی روداد کیا لکھوں

مری آنکھوں کی ویرانی یہ کہتی ہے

ترستی ہوں میں شبنم کو سمندر سوکھ جائے گا

کوئی آواز دے شام الم صبح غریباں کو

کہ دو آنسو عطا کر دے

وہ میرے قتل کی روداد ہی لکھ دے