ترا ذکر ہے ازل سے تری شان لا‌‌ بدی ہے

ترا ذکر ہے ازل سے تری شان لا‌‌ بدی ہے

تری کیا بیاں ہو رفعت تو رسول آخری ہے

میں ہوں مفلسی کا مارا تو غنی ہے تو غنی ہے

مری زندگی کا مقصد ترے در کی حاضری ہے

نہ ارم کی جستجو ہے نہ ہے سیم و زر کی حاجت

ترے در پہ موت آئے مری آرزو یہی ہے

ترے غم میں مست رہنا ترا ذکر کر کے رونا

یہی میرا مشغلہ ہے یہی میری زندگی ہے

یوں بڑھایا جا رہا ہے ترا رتبہ بیت اقدس

کہ امام تو بنا ہے جسے دیکھو مقتدی ہے

ہے ترے طفیل سالم مری زندگی درخشاں

ہے عروج مجھ کو حاصل تری بندہ پروری ہے

میں مدینے جب بھی پہنچوں تو یہ اک صدا بھی سن لوں

تو جمیلؔ نعت پڑھ اب یہی وقت حاضری ہے