lab-o-dandan zanaKHdan par ghazal kahna qayamat hai

lab-o-dandāñ zanaḳhdāñ par ġhazal kahnā qayāmat hai

ḳhayāl-e-zulf-e-yārāñ par ġhazal kahnā qayāmat hai

ruḳh-e-tābān-e-jānāñ par ġhazal kahnā qayāmat hai

siyah zulf-e-pareshāñ par ġhazal kahnā qayāmat hai

tumhārī teġh-e-abrū haiñ mirī ġhazloñ ke do misre

tumhārī chashm-e-hairāñ par ġhazal kahnā qayāmat hai

ḳhum-o-sāġhar pareshāñ haiñ sharāb-e-nāb hai hairāñ

tirī chashm-e-ġhazālāñ par ġhazal kahnā qayāmat hai

kisī ke hijr meñ jalnā kabhī aañsū bahā denā

pighaltī sham'-e-armāñ par ġhazal kahnā qayāmat hai

tajallī nuur kī bas hazrat-e-mūsā pe kī zāhir

charāġh-e-zer-e-dāmāñ par ġhazal kahnā qayāmat hai

tumhāre lām-e-nastā'līq yā koī shab-e-hijrāñ

tumhāre tīr-e-mizhgāñ par ġhazal kahnā qayāmat hai

laboñ ko kausar-o-tasnīm likhnā yuuñ to āsāñ hai

jamāl-e-māh-e-kan’āñ par ġhazal kahnā qayāmat hai

gulāb-o-aḳhgar-o-yāqūt āḳhir maiñ kahūñ kyā kyā

tire lā’l-e-badaḳhshāñ par ġhazal kahnā qayāmat hai

lab-o-dandan zanaKHdan par ghazal kahna qayamat hai

KHayal-e-zulf-e-yaran par ghazal kahna qayamat hai

ruKH-e-taban-e-jaanan par ghazal kahna qayamat hai

siyah zulf-e-pareshan par ghazal kahna qayamat hai

tumhaari tegh-e-abru hain meri ghazlon ke do misre

tumhaari chashm-e-hairan par ghazal kahna qayamat hai

KHum-o-saghar pareshan hain sharab-e-nab hai hairan

teri chashm-e-ghazalan par ghazal kahna qayamat hai

kisi ke hijr mein jalna kabhi aansu baha dena

pighalti sham'-e-arman par ghazal kahna qayamat hai

tajalli nur ki bas hazrat-e-musa pe ki zahir

charagh-e-zer-e-daman par ghazal kahna qayamat hai

tumhaare lam-e-nasta'liq ya koi shab-e-hijran

tumhaare tir-e-mizhgan par ghazal kahna qayamat hai

labon ko kausar-o-tasnim likhna yun to aasan hai

jamal-e-mah-e-kan’an par ghazal kahna qayamat hai

gulab-o-aKHgar-o-yaqut aaKHir main kahun kya kya

tere la’l-e-badaKHshan par ghazal kahna qayamat hai