ہم بلانوش سہی ہوش سے عاری تو نہیں

ہم بلانوش سہی ہوش سے عاری تو نہیں

در ساقی پہ مسرت کے بھکاری تو نہیں

کیوں قفس کے در و دیوار مہک اٹھے ہیں

راستہ بھول گئی باد بہاری تو نہیں

دل بیتاب بہلتا نہیں بہلانے سے

آپ نے زلف کہیں اپنی سنواری تو نہیں

آج کچھ دل کے تڑپنے میں ہے اک لطف عجیب

ان کی محفل میں کہیں بات ہماری تو نہیں

کبھی شبنم سے کبھی دار و رسن سے کھیلے

زندگی ہم تری راہوں کے فراری تو نہیں

فن کے نقاد سے ہندیؔ کوئی اتنا کہہ دے

شاعری ہے کوئی افسانہ نگاری تو نہیں