کسی منظر نہ کسی جسم کی عریانی سے

کسی منظر نہ کسی جسم کی عریانی سے

آنکھ حیران ہے خوابوں کی فراوانی سے

جس طرح پیاس میں پانی کا میسر آنا

میں تمہیں دیکھ رہا ہوں اسی حیرانی سے

آگ اور تیز ہوا دل کو لبھاتے ہیں مگر

گہے مٹی سے میں ڈرتا ہوں گہے پانی سے

اے فوائد مجھے دولت کے بتانے والے

شاعری کم تو نہیں تخت سلیمانی سے

جب مجھے زیست کے اسباب میسر آئے

رابطہ ٹوٹ گیا بے سر و سامانی سے

دشت سے لوٹ کے آیا ہوں تو لوگوں نے مجھے

کیسے پہچان لیا چاک گریبانی سے

بات دنیا کو عقیدت سے بتاؤ کہ سعیدؔ

چین ملتا ہے محمد کی ثنا خوانی سے