میں نے یہ کب کہا تھا سدھر جانا چاہیے

میں نے یہ کب کہا تھا سدھر جانا چاہیے

بس خود بہ خود نصیب سنور جانا چاہیے

ناصح سے اور رقیب سے نمٹوں میں کس طرح

ان میں سے ایک کو تو گزر جانا چاہیے

تصویر یار دیکھ کے زاہد نے بھی کہا

بے شک کبھی کبھار ادھر جانا چاہیے

پہلے بجا تھا رہتا تھا غصہ جو ناک پر

اب ناک کٹ گئی ہے اتر جانا چاہیے

ہم دو ہیں بس یہ خواب بہت دیکھتا ہوں میں

ان کو اب اس میں رنگ بھی بھر جانا چاہیے

الجھا ہوا ہوں مسئلۂ حور و یار میں

یہ نقد وہ ادھار کدھر جانا چاہیے

اس کو سدھارنے کا طریقہ بس ایک ہے

ناصح کو لے کے آپ کے گھر جانا چاہیے

پوچھی جو راہ کوچۂ جاناں رقیب نے

ایسی بتائی سوئے سقر جانا چاہیے

دریا چڑھا ہوا ہے وہ بالائے بام ہیں

موجیں بھی کہہ رہی ہیں ٹھہر جانا چاہیے

یا رب ذرا سے دانۂ گندم کی بات تھی

مدت ہوئی اب اس کا اثر جانا چاہیے

دعوائے عشق وہ بھی سر کوچۂ رقیب

میری سنو تو صاف مکر جانا چاہیے

ضامنؔ نظر جھکا کے وہ شرمائیں جب کبھی

موقع وہی ہے تم کو پسر جانا چاہیے