harifon ne KHilaf apne bahut khola dahan apna

harīfoñ ne ḳhilāf apne bahut kholā dahan apnā

mohabbat kī zabāñ phir bhī banā tarz-e-suḳhan apnā

hameñ ġhairoñ kī kaj-raftāriyāñ kis raah se bhā.eñ

hamārī chaal apnī hai hamārā hai chalan apnā

na-jāne kis havā meñ hai dimāġh-e-bāġhbāñ barham

chaman apnā thā aur ho kar rahegā phir chaman apnā

tum apne ho ke bhī apnoñ kā ġham jab khā nahīñ sakte

kisī se aur keh kar kyā kareñ ranj-o-mehan apnā

are o tālib-e-gul tujh ko apne zauq kī saugand

junūñ ko dekh pahle dekhnā phir pairahan apnā

yahīñ ke gul gale kā haar haiñ aur ham-nashīñ hoñge

na chhūTā hai na chhūTegā chaman apnā vatan apnā

'jamāl' in husn ke mātoñ se itnā bhī nahīñ hotā

yagānoñ se alag rakkhā kareñ begāna-pan apnā

harifon ne KHilaf apne bahut khola dahan apna

mohabbat ki zaban phir bhi bana tarz-e-suKHan apna

hamein ghairon ki kaj-raftariyan kis rah se bhaen

hamari chaal apni hai hamara hai chalan apna

na-jaane kis hawa mein hai dimagh-e-baghban barham

chaman apna tha aur ho kar rahega phir chaman apna

tum apne ho ke bhi apnon ka gham jab kha nahin sakte

kisi se aur keh kar kya karen ranj-o-mehan apna

are o talib-e-gul tujh ko apne zauq ki saugand

junun ko dekh pahle dekhna phir pairahan apna

yahin ke gul gale ka haar hain aur ham-nashin honge

na chhuTa hai na chhuTega chaman apna watan apna

'jamal' in husn ke maton se itna bhi nahin hota

yaganon se alag rakkha karen begana-pan apna