sadaqat ke talluq se qalam-kari nahin karte

sadāqat ke ta'alluq se qalam-kārī nahīñ karte

bahut se aa.ine bhī ā.ina-dārī nahīñ karte

amīr-e-shahr kī mid.hat na likkhī jā.egī ham se

ki jo ḳhuddār haiñ vo kār-e-darbārī nahīñ karte

kisī 'ayyār se achchhī tavaqqo' nā-munāsib hai

ki fasl-e-gul ke sāthī dukh meñ ġham-ḳhvārī nahīñ karte

use ḳhush rakhne ko ham apnī baazī haar jaate haiñ

ki jis ko chāhte haiñ us se hushiyārī nahīñ karte

kahāñ yaksāniyat hai un ke zāhir aur bātin meñ

ki haiñ jo haq ke haamī vo riyā-kārī nahīñ karte

hai jin meñ 'azm vo manzil kī jānib baḌhte jaate haiñ

bhañvar meñ rah ke bhī iz.hār-e-dushvārī nahīñ karte

ka.ī ahl-e-chaman is baat se nārāz rahte haiñ

ki ham 'e'jāz' kāñToñ kī taraf-dārī nahīñ karte

sadaqat ke ta'alluq se qalam-kari nahin karte

bahut se aaine bhi aaina-dari nahin karte

amir-e-shahr ki midhat na likkhi jaegi hum se

ki jo KHuddar hain wo kar-e-darbari nahin karte

kisi 'ayyar se achchhi tawaqqo' na-munasib hai

ki fasl-e-gul ke sathi dukh mein gham-KHwari nahin karte

use KHush rakhne ko hum apni bazi haar jate hain

ki jis ko chahte hain us se hushiyari nahin karte

kahan yaksaniyat hai un ke zahir aur baatin mein

ki hain jo haq ke hami wo riya-kari nahin karte

hai jin mein 'azm wo manzil ki jaanib baDhte jate hain

bhanwar mein rah ke bhi izhaar-e-dushwari nahin karte

kai ahl-e-chaman is baat se naraaz rahte hain

ki hum 'e'jaz' kanTon ki taraf-dari nahin karte