ishq ek shewa-e-be-zarar hai

'ishq ik sheva-e-be-zarar hai

is ke bā-vasf pur-sad-ḳhatar hai

tujh ko jo ḳhaak hai mujh ko zar hai

aadmī aadmī kī nazar hai

barq-e-sayyāl-e-tābindagī-hā

duḳht-e-raz hai ki ye duḳht-e-zar hai

ġhaur se sun ki rūh-ul-amīñ kī

merā har she'r āvāz-e-par hai

ai shab-e-hijr itnā batā de

kuchh yahāñ intizām-e-sahar hai

kar chukā huuñ maiñ tark-e-mohabbat

bas tirī mehrbānī kā Dar hai

mujh siyah-baḳht kī ḳhaak ai dil

surma-e-chashm-e-shams-o-qamar hai

kyā 'adam ek āzādī-e-dīd

kyā vujūd ek qaid-e-nazar hai

huuñ rahīn-e-rusūm-o-rivāyāt

aah ai zindagī tū kidhar hai

us nazar kī kare kaun tashrīh

jo nazar-dar-nazar-dar-nazar hai

guftugū ābshār-e-tarannum

ek mauj-e-tabassum nazar hai

shahr-e-ġham ke mazāfāt haiñ ye

bas kahīñ paas hī merā ghar hai

tifl-e-mā’sūm kī ik nazar sī

merī 'arz-e-vafā muḳhtasar hai

daur-e-āfāq meñ 'ishq kī zaat

muqtadar hai miyāñ muqtadar hai

haañ sañbhal kar piyo bāda-e-she'r

ek pighlā huā neshtar hai

mere naġhmoñ ne bose diye haiñ

husn-e-āfāq ab mo'tabar hai

mere har she'r kī ye ghanī chhāñv

sāhil-e-bahr-e-ġham kā shajar hai

de nazar kī asīroñ ko taufīq

jis ko dīvār samjhe haiñ dar hai

dūr-ras hai kamand-e-tabassum

yuuñ to vo apne markaz hī par hai

ik utartā huā ḳhvāb-e-sīmīñ

chāñd se chāñdnī kā safar hai

hai ye merā hī taur-o-salīqa

kitnā kam-yāb ġham kā hunar hai

duur se jis ko maiñ sun rahā huuñ

saaz kā naġhma-e-muntazar hai

saat rangoñ kī nāzuk phuvāreñ

raqs-e-qaus-e-quzah har nazar hai

bazm-e-ahbāb le mujh se ruḳhsat

saañs merī charāġh-e-sahar hai

ai 'firāq' apnī qadr aap kar luuñ

nā-shanāsoñ kī bastī meñ ghar hai

'ishq ek shewa-e-be-zarar hai

is ke ba-wasf pur-sad-KHatar hai

tujh ko jo KHak hai mujh ko zar hai

aadmi aadmi ki nazar hai

barq-e-sayyal-e-tabindagi-ha

duKHt-e-raz hai ki ye duKHt-e-zar hai

ghaur se sun ki ruh-ul-amin ki

mera har she'r aawaz-e-par hai

ai shab-e-hijr itna bata de

kuchh yahan intizam-e-sahar hai

kar chuka hun main tark-e-mohabbat

bas teri mehrbani ka Dar hai

mujh siyah-baKHt ki KHak ai dil

surma-e-chashm-e-shams-o-qamar hai

kya 'adam ek aazadi-e-did

kya wujud ek qaid-e-nazar hai

hun rahin-e-rusum-o-riwayat

aah ai zindagi tu kidhar hai

us nazar ki kare kaun tashrih

jo nazar-dar-nazar-dar-nazar hai

guftugu aabshaar-e-tarannum

ek mauj-e-tabassum nazar hai

shahr-e-gham ke mazafat hain ye

bas kahin pas hi mera ghar hai

tifl-e-ma’sum ki ek nazar si

meri 'arz-e-wafa muKHtasar hai

daur-e-afaq mein 'ishq ki zat

muqtadar hai miyan muqtadar hai

han sanbhal kar piyo baada-e-she'r

ek pighla hua neshtar hai

mere naghmon ne bose diye hain

husn-e-afaq ab mo'tabar hai

mere har she'r ki ye ghani chhanw

sahil-e-bahr-e-gham ka shajar hai

de nazar ki asiron ko taufiq

jis ko diwar samjhe hain dar hai

dur-ras hai kamand-e-tabassum

yun to wo apne markaz hi par hai

ek utarta hua KHwab-e-simin

chand se chandni ka safar hai

hai ye mera hi taur-o-saliqa

kitna kam-yab gham ka hunar hai

dur se jis ko main sun raha hun

saz ka naghma-e-muntazar hai

sat rangon ki nazuk phuwaren

raqs-e-qaus-e-quzah har nazar hai

bazm-e-ahbab le mujh se ruKHsat

sans meri charagh-e-sahar hai

ai 'firaq' apni qadr aap kar lun

na-shanason ki basti mein ghar hai