koi milta hi nahin soKHta-pa meri tarah

koī miltā hī nahīñ soḳhta-pā merī tarah

jis ko mā'lūm ho vahshat kā patā merī tarah

mere jīvan ko udāsī se milāne vaalā

dasht meñ phirtā rahe ābla-pā merī tarah

maiñ ne ahbāb ko āvāz lagā kar pūchhā

koī rahtā hai shab-e-ġham meñ sadā merī tarah

ai ka.ī din se mire zehn pe chhā.e hue shaḳhs

tū mujhe vasl ke sapne na dikhā merī tarah

raat bhar chāñd ko ahvāl sunāne ke liye

kyā Thahartī hai darīchoñ meñ havā merī tarah

zindagī merī taraf dekh ke īmāñ se batā

ek bhī shaḳhs koī tujh ko milā merī tarah

tund aur tez havāoñ ke 'ilāqe meñ 'sa'īd'

ziist kartā hai faqat dil kā diyā merī tarah

koi milta hi nahin soKHta-pa meri tarah

jis ko ma'lum ho wahshat ka pata meri tarah

mere jiwan ko udasi se milane wala

dasht mein phirta rahe aabla-pa meri tarah

main ne ahbab ko aawaz laga kar puchha

koi rahta hai shab-e-gham mein sada meri tarah

ai kai din se mere zehn pe chhae hue shaKHs

tu mujhe wasl ke sapne na dikha meri tarah

raat bhar chand ko ahwal sunane ke liye

kya Thaharti hai darichon mein hawa meri tarah

zindagi meri taraf dekh ke iman se bata

ek bhi shaKHs koi tujh ko mila meri tarah

tund aur tez hawaon ke 'ilaqe mein 'sa'id'

zist karta hai faqat dil ka diya meri tarah