taskin ko hum na roen jo zauq-e-nazar mile

taskīñ ko ham na ro.eñ jo zauq-e-nazar mile

itnā to ho ki un ke mohalle meñ ghar mile

tarmīm kī du'ā meñ ye tang aa ke shaiḳh ne

jaisī bhī ho jahāñ bhī ho fauran magar mile

vo bhī thā farq-e-'ishq-o-mohabbat se be-ḳhabar

apnī bhī ye ḳhatā thī ki dil khol kar mile

har vaqt jaan suulī pe har saañs āḳhrī

baġhdād behtar aisī mohabbat agar mile

miltā nahīñ vo ham se ki ḳhud dil meñ chor hai

apne pe e'timād ho to TuuT kar mile

sab ahl-e-qāfila the magar qāfila na thā

tanhā.ī thī agarche bahut ham-safar mile

tāḳhīr se pahuñchne pe ab dil-malūl haiñ

vo sab dayār-e-husn meñ jo dar-ba-dar mile

tujh se bigāḌ kar ke karūñ kyā maiñ ai nadīm

merī bhaḌās nikle agar chārāgar mile

tanhā.ī se sunā hai ki ghabrā rahe haiñ vo

shāyad hameñ bhī koī ab achchhī ḳhabar mile

'zāmin' ye kar rahā hai idhar kī udhar zarūr

is baar chup hī rahiyo agar nāma-bar mile

taskin ko hum na roen jo zauq-e-nazar mile

itna to ho ki un ke mohalle mein ghar mile

tarmim ki du'a mein ye tang aa ke shaiKH ne

jaisi bhi ho jahan bhi ho fauran magar mile

wo bhi tha farq-e-'ishq-o-mohabbat se be-KHabar

apni bhi ye KHata thi ki dil khol kar mile

har waqt jaan suli pe har sans aaKHri

baghdad behtar aisi mohabbat agar mile

milta nahin wo hum se ki KHud dil mein chor hai

apne pe e'timad ho to TuT kar mile

sab ahl-e-qafila the magar qafila na tha

tanhai thi agarche bahut ham-safar mile

taKHir se pahunchne pe ab dil-malul hain

wo sab dayar-e-husn mein jo dar-ba-dar mile

tujh se bigaD kar ke karun kya main ai nadim

meri bhaDas nikle agar chaaragar mile

tanhai se suna hai ki ghabra rahe hain wo

shayad hamein bhi koi ab achchhi KHabar mile

'zamin' ye kar raha hai idhar ki udhar zarur

is bar chup hi rahiyo agar nama-bar mile