mahka hua khilta hua shadab chaman hai

mahkā huā khiltā huā shādāb chaman hai

ik rūh-e-latāfat hai ki jānāñ kā badan hai

andāz-e-bayāñ meñ jo ye be-sāḳhta-pan hai

terī hī phaban aur mire dil kī lagan hai

daurāñ ke bayābāñ meñ ḳhayābāñ tirī āġhosh

is dhuup meñ āñchal hī tirā sāya-fagan hai

tārīkī-e-hijrāñ meñ utartī hī chalī jaa.e

ummīd-e-visāl aisī lapaktī sī kiran hai

dam lene ko baiThā huuñ to is dam huā mahsūs

chhāloñ meñ jalan kitnī hai kis darja thakan hai

ai yaaro koī chāra karo sham' jalāo

is ghor añdhere meñ safar duunā kaThan hai

mohlat hī kahāñ 'arz-e-tamannā kī milī hai

dil aur zabāñ meñ abhī ghamsān kā ran hai

sun lete haiñ nā-karda-vafāoñ ke fasāne

mahfil meñ kise tere sivā tāb-e-suḳhan hai

keh detā huuñ maiñ sīdhe subhāo se kharī baat

vo kahte haiñ 'parvez' baḌā sāhib-e-fan hai

mahka hua khilta hua shadab chaman hai

ek ruh-e-latafat hai ki jaanan ka badan hai

andaz-e-bayan mein jo ye be-saKHta-pan hai

teri hi phaban aur mere dil ki lagan hai

dauran ke bayaban mein KHayaban teri aaghosh

is dhup mein aanchal hi tera saya-fagan hai

tariki-e-hijran mein utarti hi chali jae

ummid-e-visal aisi lapakti si kiran hai

dam lene ko baiTha hun to is dam hua mahsus

chhaalon mein jalan kitni hai kis darja thakan hai

ai yaro koi chaara karo sham' jalao

is ghor andhere mein safar duna kaThan hai

mohlat hi kahan 'arz-e-tamanna ki mili hai

dil aur zaban mein abhi ghamsan ka ran hai

sun lete hain na-karda-wafaon ke fasane

mahfil mein kise tere siwa tab-e-suKHan hai

keh deta hun main sidhe subhao se khari baat

wo kahte hain 'parwez' baDa sahib-e-fan hai