وحشت کے ساتھ دشت مری جان چاہیے

وحشت کے ساتھ دشت مری جان چاہیے

اس عیش کے لیے سر و سامان چاہیے

کچھ عشق کے نصاب میں کمزور ہم بھی ہیں

کچھ پرچۂ سوال بھی آسان چاہیے

تجھ کو سپردگی میں سمٹنا بھی ہے ضرور

سچا ہے کاروبار تو نقصان چاہیے

اب تک کس انتظار میں بیٹھے ہوئے ہیں لوگ

امید کے لیے کوئی امکان چاہیے

ہوگا یہاں نہ دست و گریباں کا فیصلہ

اس کے لیے تو حشر کا میدان چاہیے

آخر ہے اعتبار تماشا بھی کوئی چیز

انسان تھوڑی دیر کو حیران چاہیے

جاری ہیں پائے شوق کی ایذا رسانیاں

اب کچھ نہیں تو سیر بیابان چاہیے

سب شاعراں خریدۂ دربار ہو گئے

یہ واقعہ تو داخل دیوان چاہیے

ملک سخن میں یوں نہیں آنے کا انقلاب

دو چار بار نون کا اعلان چاہیے

اپنا بھی مدتوں سے ہے رقعہ لگا ہوا

بلقیس شاعری کو سلیمان چاہیے