main apna nam tere jism par likha dekhun

maiñ apnā naam tire jism par likhā dekhūñ

dikhā.ī degā abhī battiyāñ bujhā dekhūñ

phir us ko pā.ūñ mirā intizār karte hue

phir us makān kā darvāza adh-khulā dekhūñ

ghaTā.eñ aa.eñ to ghar ghar ko Dūbtā pā.ūñ

havā chale to har ik peḌ ko girā dekhūñ

kitāb kholūñ to harfoñ meñ khalbalī mach jaa.e

qalam uThā.ūñ to kāġhaz ko phailtā dekhūñ

utaar pheñkūñ badan se phaTī purānī qamīs

badan qamīs se baḌh kar kaTā-phaTā dekhūñ

vahīñ kahīñ na paḌī ho tamannā jiine kī

phir ek baar unhīñ jañgaloñ meñ jā dekhūñ

vo roz shaam ko 'alvī' idhar se jaatī hai

to kyā maiñ aaj use apne ghar bulā dekhūñ

main apna nam tere jism par likha dekhun

dikhai dega abhi battiyan bujha dekhun

phir us ko paun mera intizar karte hue

phir us makan ka darwaza adh-khula dekhun

ghaTaen aaen to ghar ghar ko Dubta paun

hawa chale to har ek peD ko gira dekhun

kitab kholun to harfon mein khalbali mach jae

qalam uThaun to kaghaz ko phailta dekhun

utar phenkun badan se phaTi purani qamis

badan qamis se baDh kar kaTa-phaTa dekhun

wahin kahin na paDi ho tamanna jine ki

phir ek bar unhin jangalon mein ja dekhun

wo roz sham ko 'alwi' idhar se jati hai

to kya main aaj use apne ghar bula dekhun