اب دل ہے تیرے غم کا سہارا لئے ہوئے
اب دل ہے تیرے غم کا سہارا لئے ہوئے
قطرہ ہے اپنے ظرف میں دریا لئے ہوئے
اک میں ہی کیا ہوں آپ بھی مجبور عشق ہیں
ظاہر میں اختیار کا پردہ لئے ہوئے
کس کو یقین آئے قیامت کی بات کا
بیٹھے رہیں وہ وعدۂ فردا لئے ہوئے
میں غم کی وادیوں سے گزرتا چلا گیا
تیری عنایتوں کا سہارا لئے ہوئے
میرے لئے فراق کی شب بھی ہے تابناک
پھرتا ہوں شمع داغ تمنا لئے ہوئے
دیکھے وہ تجھ کو کیا جو تری بزم ناز میں
بیٹھا ہو چشم شوق کا پردہ لئے ہوئے
ہم تاجدار عشق ہیں دنیا سے کام کیا
دنیا کے لوگ ہیں غم دنیا لئے ہوئے
صابرؔ وہ بے نیاز تمنا رہیں تو کیا
جب میں ہوں اعتبار تمنا لئے ہوئے
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.