KHud mein simaT na jae agar kya kare koi

ḳhud meñ simaT na jaa.e agar kyā kare koī

hai koī dahr meñ ki tamannā kare koī

manzil agar nahīñ na sahī rah-guzar to ho

yā 'umr bhar ḳhalāoñ meñ bhaTkā kare koī

ye kyā ki ek paikar-e-nāyāft ke liye

apne vujūd par na bharosā kare koī

be-his hai ḳhizr tak to sisakne se kyā husūl

in jangaloñ meñ zor se chīḳhā kare koī

ye be-ḳhabar jilau meñ hai kis e'timād se

aise meñ dil ke saath na dhaḌkā kare koī

rah jaa.e sirf sāqī-e-sīmīñ-badan kā naam

har chiiz nazr-e-sāġhar-o-sahbā kare koī

hai chashm-e-dīgarāñ se ḳhatarnāk chashm-e-zāt

Dar hai to apne aap se parda kare koī

chehre pe karb-o-kashmakash-o-ranj-o-ġham ġharaz

aisī shaguftagī ki tamāshā kare koī

vo baat kaun sī hai jo tujh se chhupā.ī jaa.e

vo raaz kaun sā hai jo ifshā kare koī

āsāñ hai sharh-e-nukta-e-dil se ki baat meñ

asrār-e-kā.enāt huvaidā kare koī

aisī baḌī ḳhatā to nahīñ ḳhvāhishoñ kā zikr

khul jā.iye kisī se to charchā kare koī

ye ḳhush-gumāñ tahārat-o-taqvā ke jāma-zeb

dam toḌ deñ agar inheñ nangā kare koī

tujh ko to rāst-goī kī lat paḌ ga.ī 'sha'ūr'

ai kaash tere she'r na samjhā kare koī

KHud mein simaT na jae agar kya kare koi

hai koi dahr mein ki tamanna kare koi

manzil agar nahin na sahi rah-guzar to ho

ya 'umr bhar KHalaon mein bhaTka kare koi

ye kya ki ek paikar-e-nayaft ke liye

apne wujud par na bharosa kare koi

be-his hai KHizr tak to sisakne se kya husul

in jangalon mein zor se chiKHa kare koi

ye be-KHabar jilau mein hai kis e'timad se

aise mein dil ke sath na dhaDka kare koi

rah jae sirf saqi-e-simin-badan ka nam

har chiz nazr-e-saghar-o-sahba kare koi

hai chashm-e-digaran se KHatarnak chashm-e-zat

Dar hai to apne aap se parda kare koi

chehre pe karb-o-kashmakash-o-ranj-o-gham gharaz

aisi shaguftagi ki tamasha kare koi

wo baat kaun si hai jo tujh se chhupai jae

wo raaz kaun sa hai jo ifsha kare koi

aasan hai sharh-e-nukta-e-dil se ki baat mein

asrar-e-kaenat huwaida kare koi

aisi baDi KHata to nahin KHwahishon ka zikr

khul jaiye kisi se to charcha kare koi

ye KHush-guman tahaarat-o-taqwa ke jama-zeb

dam toD den agar inhen nanga kare koi

tujh ko to rast-goi ki lat paD gai 'sha'ur'

ai kash tere she'r na samjha kare koi