chaunk uThte hain har aahaT pe Dare rahte hain

chauñk uThte haiñ har aahaT pe Dare rahte haiñ

log ab chain kī nīñdoñ se pare rahte haiñ

roz-o-shab ulTe banā rakkhe haiñ ham logoñ ne

raat bhar jāgte haiñ din meñ mare rahte haiñ

cigaretteñ fikr meñ jal bujhtī haiñ lekin misre'

mere kamre meñ dhuāñ ban ke bhare rahte haiñ

'āshiqī kī vo karāmat hai ki sub.hān-allāh

suukh bhī jaa.eñ to ham log hare rahte haiñ

ye haqīqat hai zamīñ kab kī fanā ho jaatī

is kā matlab yahāñ kuchh log khare rahte haiñ

jab talak kun na kahe mālik-e-barhaq 'nahrīr'

soch ke taak pe mansūbe dhare rahte haiñ

chaunk uThte hain har aahaT pe Dare rahte hain

log ab chain ki nindon se pare rahte hain

roz-o-shab ulTe bana rakkhe hain hum logon ne

raat bhar jagte hain din mein mare rahte hain

cigaretten fikr mein jal bujhti hain lekin misre'

mere kamre mein dhuan ban ke bhare rahte hain

'ashiqi ki wo karamat hai ki subhan-allah

sukh bhi jaen to hum log hare rahte hain

ye haqiqat hai zamin kab ki fana ho jati

is ka matlab yahan kuchh log khare rahte hain

jab talak kun na kahe malik-e-barhaq 'nahrir'

soch ke tak pe mansube dhare rahte hain