نہ خاندانی روایتوں کے نہ کچھ مہارت کے بعد آیا
نہ خاندانی روایتوں کے نہ کچھ مہارت کے بعد آیا
سلیقہ جینے کا مجھ کو ہمدم تری محبت کے بعد آیا
تمہیں یہ حیرت ہے اپنے غم کو چھپا کے کیسے میں ہنس رہی ہوں
مری طبیعت میں یہ تحمل بڑی ریاضت کے بعد آیا
یہ مطمئن دل یہ نرم لہجہ شگفتگی اور یقیں خدا پر
جو سچ کہوں تو یہ سب توازن تری عنایت کے بعد آیا
مرے سفر میں جو مشکلیں تھیں زمانہ اس سے نہیں ہے واقف
جو دیکھتے ہو نشان منزل بڑی صعوبت کے بعد آیا
اداسیوں کے سفر میں کتنے اکیلے پن کے عذاب جھیلے
خوشی کا لمحہ مجھے میسر تری رفاقت کے بعد آیا
زیادہ پانے کی خواہشوں نے مجھے ہمیشہ ملول رکھا
سکوں میں رہنے کا یہ ہنر تو مجھے قناعت کے بعد آیا
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
