na KHandani riwayaton ke na kuchh mahaarat ke baad aaya

na ḳhāndānī rivāyatoñ ke na kuchh mahārat ke baa'd aayā

salīqa jiine kā mujh ko hamdam tirī mohabbat ke baa'd aayā

tumheñ ye hairat hai apne ġham ko chhupā ke kaise maiñ hañs rahī huuñ

mirī tabī'at meñ ye tahammul baḌī riyāzat ke baa'd aayā

ye mutma.in dil ye narm lahja shaguftagī aur yaqīñ ḳhudā par

jo sach kahūñ to ye sab tavāzun tirī 'ināyat ke baa'd aayā

mire safar meñ jo mushkileñ thiiñ zamāna us se nahīñ hai vāqif

jo dekhte ho nishān-e-manzil baḌī sa'ūbat ke baa'd aayā

udāsiyoñ ke safar meñ kitne akele-pan ke 'azāb jhele

ḳhushī kā lamha mujhe mayassar tirī rafāqat ke baa'd aayā

ziyāda paane kī ḳhvāhishoñ ne mujhe hamesha malūl rakkhā

sukūñ meñ rahne kā ye hunar to mujhe qanā'at ke baa'd aayā

na KHandani riwayaton ke na kuchh mahaarat ke ba'd aaya

saliqa jine ka mujh ko hamdam teri mohabbat ke ba'd aaya

tumhein ye hairat hai apne gham ko chhupa ke kaise main hans rahi hun

meri tabi'at mein ye tahammul baDi riyazat ke ba'd aaya

ye mutmain dil ye narm lahja shaguftagi aur yaqin KHuda par

jo sach kahun to ye sab tawazun teri 'inayat ke ba'd aaya

mere safar mein jo mushkilen thin zamana us se nahin hai waqif

jo dekhte ho nishan-e-manzil baDi sa'ubat ke ba'd aaya

udasiyon ke safar mein kitne akele-pan ke 'azab jhele

KHushi ka lamha mujhe mayassar teri rafaqat ke ba'd aaya

ziyaada pane ki KHwahishon ne mujhe hamesha malul rakkha

sukun mein rahne ka ye hunar to mujhe qana'at ke ba'd aaya