mehman chaar din ke aur ghar samajh liya hai

mehmān chaar din ke aur ghar samajh liyā hai

ham ne sarāb hī ko manzar samajh liyā hai

kitnoñ ne kar liyā hai duniyā ko ab musaḳhḳhar

ḳhud ko sikandaroñ se bartar samajh liyā hai

achchhā hai kyā burā kyā is baat se ġharaz kyā

bas zaat hī ko apnī mehvar samajh liyā hai

bhūle kitāb ko ham paiġhām saarā bhūle

bhaTke musāfiroñ ko rahbar samajh liyā hai

hote sabaq nahīñ jo ab yaad is jahāñ ko

un ko nisāb hī se bāhar samajh liyā hai

tahzīb apnī khoī kho baiThe 'ilm saarā

rangīnī-e-jahāñ ko zevar samajh liyā hai

ḳhud nuqs se mubarrā ḳhud 'aib se haiñ 'aarī

aur sab ko rāste kā patthar samajh liyā hai

samjhegā ḳhaak koī ab raaz is jahāñ ke

qatre ne ḳhud ko 'abrak' sāgar samajh liyā hai

mehman chaar din ke aur ghar samajh liya hai

hum ne sarab hi ko manzar samajh liya hai

kitnon ne kar liya hai duniya ko ab musaKHKHar

KHud ko sikandaron se bartar samajh liya hai

achchha hai kya bura kya is baat se gharaz kya

bas zat hi ko apni mehwar samajh liya hai

bhule kitab ko hum paigham sara bhule

bhaTke musafiron ko rahbar samajh liya hai

hote sabaq nahin jo ab yaad is jahan ko

un ko nisab hi se bahar samajh liya hai

tahzib apni khoi kho baiThe 'ilm sara

rangini-e-jahan ko zewar samajh liya hai

KHud nuqs se mubarra KHud 'aib se hain 'ari

aur sab ko raste ka patthar samajh liya hai

samjhega KHak koi ab raaz is jahan ke

qatre ne KHud ko 'abrak' sagar samajh liya hai