محتسب ہے ہوا کرے کوئی

محتسب ہے ہوا کرے کوئی

مت سنو تم بکا کرے کوئی

ایک افسر ہے ماتحت ہیں دس

کس کی حاجت روا کرے کوئی

سب کو پہنچا دیا کرو حصہ

جب بھی کچھ دے دیا کرے کوئی

دن کو منظور ہر ستم لیکن

شب کو بہلا لیا کرے کوئی

آج کل کس کی سن رہے ہیں وہ

پہلے یہ تو پتا کرے کوئی

شہر دہشت ہے یہ کہ دہشت شہر

تجزیہ تو ذرا کرے کوئی

کچھ نہ کچھ دے دیا کرو جب بھی

آنکھ ٹیڑھی کیا کرے کوئی

کہہ رہا ہوں مذاق میں سب کچھ

کچھ تو سمجھے خدا کرے کوئی