کوئی سمجھائے یہ کیا رنگ ہے مے خانے کا

کوئی سمجھائے یہ کیا رنگ ہے مے خانے کا

آنکھ ساقی کی اٹھے نام ہو پیمانے کا

کس کو معلوم تھی پہلے سے خرد کی قیمت

عالم ہوش پہ احسان ہے دیوانے کا

گرمیٔ شمع کا افسانہ سنانے والو

رقص دیکھا نہیں تم نے ابھی پروانے کا

کم نگاہی سے مری سمت سر بزم نہ دیکھ

سلسلہ ٹوٹ نہ جائے کہیں افسانے کا

چشم ساقی مجھے ہر گام پہ یاد آتی ہے

راستہ بھول نہ جاؤں کہیں مے خانے کا

اب تو ہر شام گزرتی ہے اسی کوچے میں

یہ نتیجہ ہوا ناصح ترے سمجھانے کا

یوں ہی آبادیاں پھیلیں تو کسی دن شاید

راستہ ہی نہ رہے شہر سے ویرانے کا

منزل غم سے گزرنا تو ہے آساں اقبالؔ

عشق ہے نام خود اپنے سے گزر جانے کا