hasrat bhari sahar se aziyyat ki sham se

hasrat bharī sahar se aziyyat kī shaam se

yā-rab mujhe nikāl de har ḳhvāb-e-ḳhām se

parvāz kar rahe haiñ parā.e paroñ se aap

lāzim hai gir paḌeñge zamīñ par dhaḌām se

maiñ mar rahā huuñ zarf kā saudā kiye baġhair

mayyit uThānā merī zarā dhūm-dhām se

itne dinoñ ke baa'd achānak se merī yaad

mumkin hai aap aa.e haiñ apne hī kaam se

har shaḳhs jān-levā maraz se nahīñ marā

kuchh log mar gaye haiñ davāoñ ke daam se

'kāshif' sivā-e-dil ke tire paas kuchh nahīñ

kyuuñ legā terā naam koī ehtirām se

hasrat bhari sahar se aziyyat ki sham se

ya-rab mujhe nikal de har KHwab-e-KHam se

parwaz kar rahe hain parae paron se aap

lazim hai gir paDenge zamin par dhaDam se

main mar raha hun zarf ka sauda kiye baghair

mayyit uThana meri zara dhum-dham se

itne dinon ke ba'd achanak se meri yaad

mumkin hai aap aae hain apne hi kaam se

har shaKHs jaan-lewa maraz se nahin mara

kuchh log mar gaye hain dawaon ke dam se

'kashif' siwa-e-dil ke tere pas kuchh nahin

kyun lega tera nam koi ehtiram se