مسافر تیری منزل ہی سفر ہے

مسافر تیری منزل ہی سفر ہے

یہ دنیا چند سالوں کا ہی گھر ہے

ہمیں خانہ بدوشی بھا رہی ہے

سفر کی دھوپ ہی اپنا شجر ہے

چلے تھے ڈھونڈھنے اپنا جہاں ہم

کہاں پر کھو گئے کس کو خبر ہے

ہزاروں میل لمبے راستے ہیں

ہماری خار سے لپٹی ڈگر ہے

ذرا سستا تو لوں ان وادیوں میں

سہانی رت میں کھو جانے کا ڈر ہے

کسی ہمراہ نے ٹوکا تھا مجھ کو

سڑک یہ بند ہے جاتی کدھر ہے

وفا کی راہ پر چلتے ہوئے ہم

وہاں پہنچے جہاں بس گل مہر ہے

چلی باد صبا کوثرؔ کی جانب

نمی اوڑھے ہوئے خوشبو سے تر ہے