musafir teri manzil hi safar hai

musāfir terī manzil hī safar hai

ye duniyā chand sāloñ kā hī ghar hai

hameñ ḳhāna-badoshī bhā rahī hai

safar kī dhuup hī apnā shajar hai

chale the DhūñDhne apnā jahāñ ham

kahāñ par kho ga.e kis ko ḳhabar hai

hazāroñ miil lambe rāste haiñ

hamārī ḳhaar se lipTī Dagar hai

zarā sustā to luuñ in vādiyoñ meñ

suhānī rut meñ kho jaane kā Dar hai

kisī ham-rāh ne Tokā thā mujh ko

saḌak ye band hai jaatī kidhar hai

vafā kī raah par chalte hue ham

vahāñ pahuñche jahāñ bas gul-mohar hai

chalī bād-e-sabā 'kausar' kī jānib

namī oḌhe hue ḳhushbū se tar hai

musafir teri manzil hi safar hai

ye duniya chand salon ka hi ghar hai

hamein KHana-badoshi bha rahi hai

safar ki dhup hi apna shajar hai

chale the DhunDhne apna jahan hum

kahan par kho gae kis ko KHabar hai

hazaron mil lambe raste hain

hamari KHar se lipTi Dagar hai

zara susta to lun in wadiyon mein

suhani rut mein kho jaane ka Dar hai

kisi ham-rah ne Toka tha mujh ko

saDak ye band hai jati kidhar hai

wafa ki rah par chalte hue hum

wahan pahunche jahan bas gul-mohar hai

chali baad-e-saba 'kausar' ki jaanib

nami oDhe hue KHushbu se tar hai