karwan-e-zindagani hai rawan apni jagah

kārvān-e-zindagānī hai ravāñ apnī jagah

sāz-e-dil apnī jagah hai soz-e-jāñ apnī jagah

kuchh nahīñ badlā kahīñ tere bichhaḌ jaane ke baa'd

ye zamīñ apnī jagah vo āsmāñ apnī jagah

maslahat ye bhī ḳhudā kī dekhne kī chiiz hai

munjamid māhaul meñ sail-e-ravāñ apnī jagah

vaqt kī raftār kā dil par asar hotā nahīñ

ḳhvāhisheñ apnī jagah 'umr-e-ravāñ apnī jagah

mashq kartī huuñ musalsal bhuul jaane kī use

naam us kā hai magar vird-e-zabāñ apnī jagah

mo'tabar donoñ haiñ 'mīnā' ek bhī kamtar nahīñ

ahl-e-dil apnī jagah ahl-e-zabāñ apnī jagah

karwan-e-zindagani hai rawan apni jagah

saz-e-dil apni jagah hai soz-e-jaan apni jagah

kuchh nahin badla kahin tere bichhaD jaane ke ba'd

ye zamin apni jagah wo aasman apni jagah

maslahat ye bhi KHuda ki dekhne ki chiz hai

munjamid mahaul mein sail-e-rawan apni jagah

waqt ki raftar ka dil par asar hota nahin

KHwahishen apni jagah 'umr-e-rawan apni jagah

mashq karti hun musalsal bhul jaane ki use

nam us ka hai magar wird-e-zaban apni jagah

mo'tabar donon hain 'mina' ek bhi kamtar nahin

ahl-e-dil apni jagah ahl-e-zaban apni jagah