shiddat-e-ehsas-e-tanhai mein hum rahne lage

shiddat-e-ehsās-e-tanhā.ī meñ ham rahne lage

ik havelī chhoḌ kar khaa.ī meñ ham rahne lage

chashm-e-ulfat ḳhvāb-e-rā'nā.ī meñ ham rahne lage

har ghaḌī zikr-e-shanāsā.ī meñ ham rahne lage

un se āñkheñ milte hī mash.hūr har jānib hue

jaane kaisī kaisī rusvā.ī meñ ham rahne lage

yaar biivī bachche rishte bhaa.ī bahneñ vāldain

baarī baarī sab kī bīnā.ī meñ ham rahne lage

dard-e-dil dard-e-jigar dard-e-tamannā dard-e-shauq

dard kī kis darja gahrā.ī meñ ham rahne lage

chashm-e-mahbūba meñ utre to ye andāza huā

bahr-e-be-pāyāñ kī gahrā.ī meñ ham rahne lage

shā'irī bhī hai kahīñ zaḳhm-e-tamannā kā 'ilāj

is liye bhī ḳhāma-farsā.ī meñ ham rahne lage

āñkhoñ meñ dil meñ jigar meñ ruuh meñ pahle hī the

yuuñ huā ab us kī añgḌā.ī meñ ham rahne lage

hijr-e-mahbūba meñ 'amjad' jiinā mushkil ho gayā

kitnī kulfat kitnī kaThnā.ī meñ ham rahne lage

shiddat-e-ehsas-e-tanhai mein hum rahne lage

ek haweli chhoD kar khai mein hum rahne lage

chashm-e-ulfat KHwab-e-ra'nai mein hum rahne lage

har ghaDi zikr-e-shanasai mein hum rahne lage

un se aankhen milte hi mashhur har jaanib hue

jaane kaisi kaisi ruswai mein hum rahne lage

yar biwi bachche rishte bhai bahnen waldain

bari bari sab ki binai mein hum rahne lage

dard-e-dil dard-e-jigar dard-e-tamanna dard-e-shauq

dard ki kis darja gahrai mein hum rahne lage

chashm-e-mahbuba mein utre to ye andaza hua

bahr-e-be-payan ki gahrai mein hum rahne lage

sha'iri bhi hai kahin zaKHm-e-tamanna ka 'ilaj

is liye bhi KHama-farsai mein hum rahne lage

aankhon mein dil mein jigar mein ruh mein pahle hi the

yun hua ab us ki angDai mein hum rahne lage

hijr-e-mahbuba mein 'amjad' jina mushkil ho gaya

kitni kulfat kitni kaThnai mein hum rahne lage