سکوت زرد کبھی سرخ سی صدا ہو کر

سکوت زرد کبھی سرخ سی صدا ہو کر

مجھے دکھائی دیا زہر کیا سے کیا ہو کر

رواں رہا مرے سینے پہ رات کا دریا

گھرا تھا سر پہ سیہ آسماں گھٹا ہو کر

سفید سانپ کہ سویا پڑا تھا جنگل میں

چمک گیا مری آنکھوں میں راستا ہو کر

یہ سطح آب کی لرزش ہے میرے دم سے کہ میں

رچا ہوا ہوں فضا میں رم ہوا ہو کر

ڈرائے رکھتا ہے سب کو جو تیز کانٹوں سے

کبھی ملا تھا مجھے شاخ سے جدا ہو کر

بکھر چلا ہوں ظفرؔ راکھ بن کے راہوں میں

میں دل کی آگ سے نکلا تھا کیمیا ہو کر