KHwab aazadi ka aankhon mein machalta dekhun

ḳhvāb āzādī kā āñkhoñ meñ machaltā dekhūñ

qaid piñjre meñ agar koī parinda dekhūñ

lab ko yā aañkh ko yā husn sarāpā dekhūñ

do hī āñkhoñ se bhalā aur maiñ kyā kyā dekhūñ

kyuuñ liye phirtā hai chehre pe mukhauToñ kā hujūm

kab se hai dil meñ tamannā tujhe tanhā dekhūñ

dil ye kartā hai nikal jā.ūñ kisī din ḳhud se

aur phir duur se ḳhud apnā tamāsha dekhūñ

merī āñkhoñ meñ talab jhāñk rahī hai terī

yuuñ hī kab tak dil-e-nāshād ko rotā dekhūñ

ġham kī jo barf hai dil meñ vo pighal jaa.e to

shauq se āñkhoñ ke raste tujhe bahtā dekhūñ

be-ḳhatā qaid huuñ ab khol do bāb-e-zindāñ

tā-ki insāf ke mīzān ko biktā dekhūñ

terī āġhosh-e-mohabbat meñ pighal jā.ūñ maiñ

yā'nī sūraj ko samundar meñ utartā dekhūñ

ek muddat se nahīñ dekhā hai ḳhud ko 'ahmad'

paas aa jā ki tirī āñkhoñ meñ chehra dekhūñ

KHwab aazadi ka aankhon mein machalta dekhun

qaid pinjre mein agar koi parinda dekhun

lab ko ya aankh ko ya husn sarapa dekhun

do hi aankhon se bhala aur main kya kya dekhun

kyun liye phirta hai chehre pe mukhauTon ka hujum

kab se hai dil mein tamanna tujhe tanha dekhun

dil ye karta hai nikal jaun kisi din KHud se

aur phir dur se KHud apna tamasha dekhun

meri aankhon mein talab jhank rahi hai teri

yun hi kab tak dil-e-nashad ko rota dekhun

gham ki jo barf hai dil mein wo pighal jae to

shauq se aankhon ke raste tujhe bahta dekhun

be-KHata qaid hun ab khol do bab-e-zindan

ta-ki insaf ke mizan ko bikta dekhun

teri aaghosh-e-mohabbat mein pighal jaun main

ya'ni suraj ko samundar mein utarta dekhun

ek muddat se nahin dekha hai KHud ko 'ahmad'

pas aa ja ki teri aankhon mein chehra dekhun