us dil mein mera dard uga hai to kahan hai

us dil meñ mirā dard ugā hai to kahāñ hai

patthar meñ agar phuul khilā hai to kahāñ hai

tū mujh ko kahīñ aur dikhā.ī nahīñ detā

tū aur kahīñ mere sivā hai to kahāñ hai

merī to har ik aah risāloñ meñ hai mahfūz

tū ne bhī koī she'r likhā hai to kahāñ hai

īsār ke maqtal meñ galā apnā kaTānā

ye maslak-e-arbāb-e-vafā hai to kahāñ hai

tā-hadd-e-nazar zehn kā maidān hai chaTiyal

āñdhī se koī peḌ bachā hai to kahāñ hai

kal shab mire bachche ne kahā mujh se lipaT kar

abbū ye dikhāo ki ḳhudā hai to kahāñ hai

kuchh aur ba-juz ḳhaar nazar to nahīñ aatā

shāḳhoñ ne koī phuul chunā hai to kahāñ hai

ye raat kā 'ālam ye bayābāñ kī masāfat

aise meñ agar koī diyā hai to kahāñ hai

dekhī huī tasvīr dikhāte haiñ suḳhan-var

lahje meñ koī rang nayā hai to kahāñ hai

be-rūh ḳhayāloñ kī zabāñ tak nahīñ khultī

murdoñ meñ agar saut-o-sadā hai to kahāñ hai

ik habs muqayyad hai mire dīda-o-dil meñ

in band utāqoñ meñ havā hai to kahāñ hai

qātil bhī 'adālat se barī hote haiñ zulfī

duniyā meñ shaqāvat kī sazā hai to kahāñ hai

us dil mein mera dard uga hai to kahan hai

patthar mein agar phul khila hai to kahan hai

tu mujh ko kahin aur dikhai nahin deta

tu aur kahin mere siwa hai to kahan hai

meri to har ek aah risalon mein hai mahfuz

tu ne bhi koi she'r likha hai to kahan hai

isar ke maqtal mein gala apna kaTana

ye maslak-e-arbab-e-wafa hai to kahan hai

ta-hadd-e-nazar zehn ka maidan hai chaTiyal

aandhi se koi peD bacha hai to kahan hai

kal shab mere bachche ne kaha mujh se lipaT kar

abbu ye dikhao ki KHuda hai to kahan hai

kuchh aur ba-juz KHar nazar to nahin aata

shaKHon ne koi phul chuna hai to kahan hai

ye raat ka 'alam ye bayaban ki masafat

aise mein agar koi diya hai to kahan hai

dekhi hui taswir dikhate hain suKHan-war

lahje mein koi rang naya hai to kahan hai

be-ruh KHayalon ki zaban tak nahin khulti

murdon mein agar saut-o-sada hai to kahan hai

ek habs muqayyad hai mere dida-o-dil mein

in band utaqon mein hawa hai to kahan hai

qatil bhi 'adalat se bari hote hain zulfi

duniya mein shaqawat ki saza hai to kahan hai