فرقت گزیدہ جسم ہے اور وقت رات کا
فرقت گزیدہ جسم ہے اور وقت رات کا
سینے میں آ گھسا ہے خلا کائنات کا
خالی کتاب رکھ دی تھی آنکھوں کے روبرو
اور ڈھونڈنا تھا راستہ اس میں نجات کا
اک روشنی نے مانگ لی قیمت وجود کی
ہے قرض یہ شعور پہ شاید حیات کا
تصویر کھولتی رہی پرتیں خیال کی
ہر زاویہ تھا نقش کسی واردات کا
خوابوں کے جسم چاک تھے نیندوں کے جبر سے
سورج نکل رہا تھا مگر ممکنات کا
سانسیں تو چل رہیں تھیں فقط رسم زیست میں
احساس پر نہیں تھا کوئی بھی حیات کا
دھڑکن میں گونجتی ہیں صدائیں پرانی سی
سناٹا بولتا ہے یہاں روز رات کا
میں نے خلا کو چھو لیا انداز عشق میں
میں ہی وہ آئنہ ہوں کسی ممکنات کا
یادوں کا شور پھیل گیا ہے وجود میں
آغاز ہو چکا ہے نئی کیفیات کا
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.