دیکھ لی دنیا تری میں نے نوازش دیکھ لی

دیکھ لی دنیا تری میں نے نوازش دیکھ لی

میری بربادی میں کیا ہے تیری کاوش دیکھ لی

تیری دولت شان و شوکت تیرے کام آئی نہیں

موت سے بچنے کی تو نے کر کے کوشش دیکھ لی

عشق کا مطلب سمجھ پایا نہیں تو آج تک

بد ہوس انسان میں نے تیری خواہش دیکھ لی

اٹھ گیا دنیا سے جیسے پردہ داری کا چلن

ہر طرف آنکھوں نے جسموں کی نمائش دیکھ لی

کوشش اخفائے راز عشق ممکن ہی نہیں

میں نے اس کے سامنے کر کے یہ کوشش دیکھ لی

اب تو بس یہ دیکھنا ہے کیا دکھاتی ہے قضا

زندگی میں زندگی کی ساری سازش دیکھ لی

زر زمیں جورو کی خاطر ہر زمانے میں کبیرؔ

ایک ماں کے ہم نے دو بیٹوں میں رنجش دیکھ لی