نہ سلیمان نہ اس ملک سے کافر آیا

نہ سلیمان نہ اس ملک سے کافر آیا

عدم آباد سے پھر کر نہ مسافر آیا

گور پر میرے جنازے کو احبا لائے

للہ الحمد کہ منزل پہ مسافر آیا

کمر یار کی تصویر کسی سے نہ کھنچی

ایک سے ایک زمانے میں مصور آیا

دی نہ آنکھوں میں اترنے کی جگہ کیا باعث

قافلہ خون جگر کا متواتر آیا

کل مجھے جنس فضائل سے ہو کیا چشم امید

آج تک کون خریدار جواہر آیا

ہنس کے کنگھی کے لئے بال جو کھولے اس نے

صاعقہ گرنے لگا ابر سیہ گھر آیا

اشک ہمراہ نہ لائے تو ہوا کیا حاصل

لخت دل آنکھوں میں اٹھ بیٹھ کے آخر آیا

ہاتھ پھیلائے ہوں آؤ تو گلے سے مل لوں

لیجئے وقت خدا حافظ و ناصر آیا

دھیان اس شوخ کا میں کر نہیں سکتا کاملؔ

رات کس ناز سے تا حجلۂ خاطر آیا