zist kya zist ka meyar samajh lete hain

ziist kyā ziist kā me'yār samajh lete haiñ

kaun hai sāhib-e-kirdār samajh lete haiñ

un se insāf kī ummīd na rakkhe koī

vo to mā'sūmoñ ko ġhaddār samajh lete haiñ

hausla ho to koī kaam bhī dushvār nahīñ

aap dushvār ko dushvār samajh lete haiñ

mere paaoñ meñ khanaktī hai jo zanjīr-e-vafā

log pāzeb kī jhankār samajh lete haiñ

sahn-e-gulshan meñ haiñ kuchh ahl-e-siyāsat maujūd

phuul ko phuul nahīñ ḳhaar samajh lete haiñ

apne hoñToñ meñ dabā lījiye dil kī bāteñ

raaz kī baat samajhdār samajh lete haiñ

aap ke paas mudāvā hai dukhoñ kā shāyad

aa.iye aap ko ġham-ḳhvār samajh lete haiñ

bāñdh ke sar pe kafan ghar se nikalne vaale

gardish-e-vaqt kī raftār samajh lete haiñ

paar ho jaate haiñ tūfān-e-balā se 'muztar'

'azm ko āhanī patvār samajh lete haiñ

zist kya zist ka me'yar samajh lete hain

kaun hai sahib-e-kirdar samajh lete hain

un se insaf ki ummid na rakkhe koi

wo to ma'sumon ko ghaddar samajh lete hain

hausla ho to koi kaam bhi dushwar nahin

aap dushwar ko dushwar samajh lete hain

mere paon mein khanakti hai jo zanjir-e-wafa

log pazeb ki jhankar samajh lete hain

sahn-e-gulshan mein hain kuchh ahl-e-siyasat maujud

phul ko phul nahin KHar samajh lete hain

apne honTon mein daba lijiye dil ki baaten

raaz ki baat samajhdar samajh lete hain

aap ke pas mudawa hai dukhon ka shayad

aaiye aap ko gham-KHwar samajh lete hain

bandh ke sar pe kafan ghar se nikalne wale

gardish-e-waqt ki raftar samajh lete hain

par ho jate hain tufan-e-bala se 'muztar'

'azm ko aahani patwar samajh lete hain