wahan ki ret se bhi raushni nikalti hai

vahāñ kī ret se bhī raushnī nikaltī hai

ḳhudī ko lene jahāñ be-ḳhudī nikaltī hai

dhamāl kartā huuñ us ko talāshtā huuñ maiñ

mirī talāsh meñ jab āgahī nikaltī hai

ye kaisā tujh se ta'alluq juḌā mire hamdam

karūñ na yaad agar jaañ mirī nikaltī hai

suḳhan ke phuul mahakte haiñ bazm-e-jānāñ meñ

hamāre she'r se jab tāzgī nikaltī hai

hamāre bachchoñ ke chehre utarne lagte haiñ

hamārī jeb se jab ḳhāmushī nikaltī hai

'abas ḳhayāl hī bante nahīñ ye ahl-e-suḳhan

qalam kī nok se ik raushnī nikaltī hai

jahāñ pe 'ishq kī baazī maiñ haar jaatā huuñ

manāne jashn vahāñ bebasī nikaltī hai

hamāre she'r ko saada samajh rahe haiñ vo

hamārī baat magar mantiqī nikaltī hai

hamāre purse meñ sikke faqat ḳhayāloñ ke

hamārī jeb se bhī shā'irī nikaltī hai

mileñ jo manzileñ yuuñ kārvān-e-chāhat kī

fareb de ke hameñ zindagī nikaltī hai

ġharīb-e-shahr to tanhā kabhī nahīñ rotā

gale lagāne use muflisī nikaltī hai

samundaroñ kī kahānī bahut sunī maiñ ne

mujhe pata hai kahāñ jal-parī nikaltī hai

hamāre lahje meñ ho baat to 'bashar' sāhab

dukhoñ ke des meñ ban kar ḳhushī nikaltī hai

wahan ki ret se bhi raushni nikalti hai

KHudi ko lene jahan be-KHudi nikalti hai

dhamal karta hun us ko talashta hun main

meri talash mein jab aagahi nikalti hai

ye kaisa tujh se ta'alluq juDa mere hamdam

karun na yaad agar jaan meri nikalti hai

suKHan ke phul mahakte hain bazm-e-jaanan mein

hamare she'r se jab tazgi nikalti hai

hamare bachchon ke chehre utarne lagte hain

hamari jeb se jab KHamushi nikalti hai

'abas KHayal hi bante nahin ye ahl-e-suKHan

qalam ki nok se ek raushni nikalti hai

jahan pe 'ishq ki bazi main haar jata hun

manane jashn wahan bebasi nikalti hai

hamare she'r ko sada samajh rahe hain wo

hamari baat magar mantiqi nikalti hai

hamare purse mein sikke faqat KHayalon ke

hamari jeb se bhi sha'iri nikalti hai

milen jo manzilen yun karwan-e-chahat ki

fareb de ke hamein zindagi nikalti hai

gharib-e-shahr to tanha kabhi nahin rota

gale lagane use muflisi nikalti hai

samundaron ki kahani bahut suni main ne

mujhe pata hai kahan jal-pari nikalti hai

hamare lahje mein ho baat to 'bashar' sahab

dukhon ke des mein ban kar KHushi nikalti hai